Amalunga ebandla leMthwakazi Republic Party angamatshumi amabili -20 abotshwe ngamapholisa namuhlanje eNguboyenja koBulawayo, ngesikhathi uhulumende kamongameli Emmerson Mnangagwa eqhubekela phambili ebopha abalwela amalungelo oluntu labamabandla aphikisayo.
Kulabantu abedlula ikhulu asebebotshiwe njalo abanengi belokhu bevalelwe eHarare, koBulawayo lakwamanye amadolobho.
EMasvingo, kulesethekeli esivela kwele Czech Republic esilokhu sivalelwe ngemva kokubotshelwa ukuthatha ivideo sichaza ukuthi akulamanzi lamagetshi kulelodolobho.
Inhlanganiso yamagqwetha alwela amalungelo oluntu eyeZimbabwe Lawyers for Human Rights yazise enkundleni yokuxhumana eye “X” ukuthi abacatshangwele ukuthi ngamapholisa asehlasele amahofisi eCrisis in Zimbabwe Coalition le-ZINASU eHarare.
Isikhulumeli samapholisa uCommissioner Paul Nyathi walile ukuthi kulokubotshwa mahlayana kwabalwela amalungelo oluntu, esithi amapholisa alondoloza umthetho welizwe. Wengeze esithi abalokukhonona ngokuziphatha kwamapholisa bayavunyelwa ukuwamangalela amapholisa.
UMnu. Velile Moyo isikhulumeli sebandla le-M-R-P uthe babotshwe beqhuba uhlelo lwe-Clean-up Campaign betheswa amacala okubikwa bawenza kudala.
Ingcwethi yezombusazwe njalo ekhokhela inhlanganiso emela abathengi eyeNational Consumer Rights Association uMnu Effie Dlela Ncube uthe ukuphatha umhlangano weSADC Summit bekulithuba elihle elokuthi ilizwe leZimbabwe lizikhangise njengelizwe elilungele ukwamukela abavela kwamanye amazwe kodwa lelithuba selilahlekile.
Forum