Amapholisa asebophe abaphikisayo abakubandla leCitizens Coalition for Change (CCC) emadolobheni atshiyeneyo, abalwala ilungelo lolontu labanye ngesikhathi eleZimbabwe lilungiselela umhlangano omkhulu oweSADC ozaqhutshwa kumaviki amabili azayo.
Omunye wababotshwe namuhla nguMnu. Jacob Ngarivhume umkhokheli webandla leTransform Zimbabwe, umkhokheli weZimbabwe National Students Union uMnu. Emmanuel Stima, uMfundisi uKevin Nyamakanga labakubandla leCCC koBulawayo, Mutare, Kariba lamanye amadolobho.
Amapholisa athi ukubotshwa kwabo akutsho ukuthi abantu eZimbabwe kabasavunyelwa ukwenza imihlangano. Kodwa abaphikisayo bathi kwenzelwa ukuthi abaphikisayo njalo abasola indlela okwaqhutshwa ngayo ukhetho eZimbabwe nyakenye bengashengiseli ngesikhathi kuqhutshwa umhlangano weSADC Summit eHarare.
UMfundisi Raymond Motsi olwela ilungelo loluntu uthi kuyethus okwenzakala eZimbabwe.
Amazwe entshonalanga agoqela eleBhilithane, eleMelika, eleNetherlands njalo lenhlanganiso zamazwe agoqela eyeEuropean Union bachothoza okwenzakala elizweni. Lokhu kusekelwa nguMnu. Effie Dlela Ncube, umqondisi weNational Consumer Rights Association.
Kodwa uMnu. Believe Gaule owebandla leZanu PF uthi uhulumende uyakwazi akwenzayo.
Umphathintambo wendaba zekhaya, uMnu. Kazembe Kazembe, uthi bazajeziswa bonke abafuna ukutshengisela eZimbabwe ngesikhathi somhlangano weSADC Summit.
Kubikwa ukuba amapholisa asedinga amanye njalo amalunga ebandla leCCC agoqela uMnu. Takudzwa Ngadziore labanye njalo loMnu. Job Sikhala okhokhela inhlanganiso yeNational Democracy Working Group.
Forum