Abaqeqetshi beqembu labesilisa elimela ilizwe emdlalweni wenguqu sebebize abadlali abangamatshumi amathathu ukuthi bazoqala amalungiselelo awokuyaphatheka kumncintiswano we Africa Cup of Nations ozaqhutshelwa kwele Cameroon ekuqaleni kukaZibandlela womnyaka ozayo ka2022.
Abadlali ababizwe kuqembu lesizwe elama Warriors bakhangelelwe ukuqala amalungiselelo mhla zimatshumi mabili lantathu-23 Mpalakazi, esigodlweni iHarare, belungiselela ukuyadlala kwele Cameroon ngomnyaka ozayo.
Ngemva kwalokho abaqeqetshi bakhangelelwe ukuba bakhethe abadlali abangamatshumi amabili lantathu okuyibo abazakuyadlala kumncintiswano we Africa Cup of Nations nxa ilizwe le Zimbabwe lingasamiswanga ukudlala lamanye amazwe ngenxa yengxabano ekhona phakathi kwekhmoshini eye Sport and Recreation Commission lenhlanganiso eqondisa umdlalo wenguqu, eye Zimbabwe Football Association.
Intathelizindaba yezemidlalo UNash Mkokwayarira uthi udidwa yikuba khona kwabadlali asebekhulile kuqembu elibizwe ngabaqeqetshi bama Warriors.
“Into obekumele siqale sibeyazi yikuthi kanti vele injongo yethu eyokuya kumidlalo ye Africa Cup of Nations ngeyani. Ngeyokunqoba siphakamise inkezo kumbe ngeyokuthi siphe abadlali bethu ithuba lokuba bathengwe?
Bekumele sifake abadlali abanengi abasakhulayo kulokugcwalisa abadlali asebeleminyaka eyedlula amatshumi amabili ngoba bona kabasathengiseki njalo kangiboni kungabadlali abangasincedisa ukuba sithathe inkezo,” kutsho uMkokwayarira.
Obhala indaba zemidlalo uFortune Mbele uthi yena uthokoziswa yikuba khona komgadli uPrince Dube obeselesikhathi eside engesiyo ngxenye yeqembu lesizwe.
“Okunye engikubone kubalulekile yikuphenduka kuka Prince Dube ngemva kwesikhathi eside elimele ngoba nguye umuntu ongenza umehluko omkhulu uma engaphiwa isikhathi esokuba adlale,” kutsho uMbele.
Ocubungula ezemidlalo uWashington Sibanda yena uthi ulethemba elokuba abadlali abakhethiweyo bazaqhuba kuhle khonale kwele Cameroon.
“Ngibona angani ngabadlali abangayenelisa ukuba bawuthwale umsebenzi esikhangelane lawo lapho esizahlangana khona labo Senegal khonale eCameroon ngoba sonke nje sifisa ukuba iqembu lethu lidlale kuhle khonale,” kutsho uSibanda.
Iqembu le Zimbabwe likusibaya sika Group B ndawonye lele Senegal, ele Guinea kanye lele Malawi.
Umncintiswano we Afcon ukhangelelwe ukuqala mhla ziyithoba munwe munye kunyanga kaZibandlela usiyafika emaphethelweni mhla ziyisithupha kunyanga kaNhlolanja.
Kulabadlali abathenjiweyo abadlala phandle kwelizwe abangabizwanga kuqembu lesizwe ababalisa uMarvelous Nakamba, uBrendan Galloway kanye lo Marshal Munetsi bona abadlala phetsheya kolwandle kodwa abangekhoyo ngoba belimele kuthi uKhama Billiat odlala kwele South Africa sewathatha umhlalaphansi.
Kusenjalo iqembu le Zimbabwe livele lingalaluka lingasayanga kwele Cameroon nxa inhlanganiso yeSports and Recreation Commission ingasalandelanga isixhwayiso esivele kunhlanganiso ye Federation of International Football Association, i Fifa, ukuba inkokheli ye Zifa eholwa ngu Felton Kamambo ibiselwe emsebenzini kungakafiki mhla zintathu kunyanga kaZibandlela.
Inhlanganiso ye SRC imise umsebenzi inkokheli ye Zifa ngenyanga ka Lwezi iyiyethesa amacala okungaqhubi ngemfanelo umsebenzi wokukhokhela umdlalo wenguqu elizweni.
