Eyinye yenkhokheli yabatsha ebandleni leMDC-T umnumzana , James Chidhakwa, Rhino Mashaya lo Keith Charumbira babikwa bebhaxabulwe kakubi ngoLwesibili emini ngabanakanelwa ukuthi ngabasekeli bebandla leZanu PF bevela emthethwandaba ukuyasekela ekuthonisweni komgcinisihlalo wohlangothi lwabatsha esigabeni seHarare umnumzana Eric Murayi edale likaMantshi eMbare.
Abathathu laba babikwa belimele kakubi okokuthi uMashaya utshaywe wawa amazinyo amane wephulwa imbambo. UChidhakwa loCharumbira bonke balamanxeba okutshaywa ekhanda njalo sikhulumanje balaliswe esibhedlela seHarare hospital.
Kunjalo nje, abasekeli bebandla linye leMDC-T ababotshwe kudlakela lokulwisana phakathi kwabo labeZanu PF ngeSonto abalitshumi lasikhombisa bamiswe phambi komthethwandaba lamhlanje becela ukuthi bavunyelwe ukuhlawula imali yesibambiso eyebail ukuze bathoniswe bevela ngekhaya kodwa umantshi ubikwa ethe uzahlaziya isicelo lesi anduba aphe isinqumo ngoLwesithathu.