Umqeqetshi weqembu elimela isizwe emdlalweni wenguqu elama Warriors uKallisto Pasuwa uthi isikhathi esifitshane esokulungiselela umdlalo siphazamise abafana bakhe emdlalweni wabo leqembu le Guinea wona ophele zingutshiki lobhanqa 1 ka 1 ngeSonto.
Iqembu le Zimbabwe selilemiklomelo emine ngemva kwemidlalo emibili njalo lilingene ngemiklomelo leqembu elimela ilizwe le Swaziland lona elibe ngutshiki lobhanqa lele Malawi nge 2 ka 2.
Iqembu le Malawi lele Guinea alomklomelo owodwa iqembu ngalinye.
Abalandeli bomdlalo wenguqu bebekhangelele ukuba iqembu lama Warriors lizabhuqa ele Guinea ngeSonto enkundleni ye Rufaro njengoba belidlala lisekhaya kodwa lokhu kusuke kwaba nzima ngemva kokuba iZimbabwe ihle yahlohlwa umdlalo uqala.
Unozinti uWashington Arubi nguye owenze iphutha elidale ukuba iqembu le Guinea lihlohle kodwa umqeqetshi waleliqembu uKallisto Pasuwa uthi imbangela yalokhu yikuba abafana bakhe babe lesikhathi esincane bezilolonga bendawonye.
Umgadli uKnowledge Musona nguye olinganisele iqembu le Zimbabwe.
Impumela yeminye imidlalo ye Afcon ebikhona ngempelaviki edluleyo iveza ukuba iqembu le South Africa liqhuba nzima kusibaya sika Group M lapho okuyilo elijeke amanye amaqembu ngemva kokudliwa ngele Mauritania nge 3 ka 1.
Iqembu eselaphakamisa inkezo ye Afcon kasikhombisa ele Egypt lona elingenelisanga ukuphatheka kumncintiswano emithathu yeAfcon eyadlulayo lisesimeni esihle kusibaya sika Group G ngemva kokutshaya ele Chad 5 - 1 okuyimpumela elitshiye lihlezi phezu kwengalane yesibaya lilemiklomelo eyisithupha kuthi ngaphansi kwalo kuleqembu le Nigeria elilemiklomelo emine.
Imidlalo elandelayo kumkhankaso wokudinga amaqembu azakuyadlala kumncintiswano we Afcon ozaqhutshelwa elizweni le Gabon ngomnyaka ka 2017 izakuba khona ngenyanga ka Mbimbitho ngomnyaka ozayo.
Ngaphetsheya kolwandle amanye amaqembu asephumelele ukuyadlala kumidlalo ye Euro 2016 ngemva kwemidlalo ebikhona ngempelaviki ngathi ele England, ele Czech Republic kanye lele Iceland.
Umkhankaso uqhubekela phambili njalo namhla kulemidlalo embalwa emazweni atshiyeneyo akuzwekazi le Europe.
Imidlalo ye Euro 2016 izaqhutshelwa elizweni le France ngenyanga kaNhlangula loNtulikazi.