Uhlangothi lwezempilakahlekukhansili yakoBulawayo luthi kunganeno ukumemetheka kwegciwane leCoronavirus COVID-19 koBulawayo nxa kuqathaniswa lezinye indawe eZimbabwe.
Lokhu kwethulwe ngesikhathi isibhedlela seThorngrove Isolation Hospital sithola uncedo olutshiyeneyo ukwenzela ukuvimba ukumemetheka komkhuhlane weCOVID-19.
Umkhuhlane weCovid-19 uqhubekela phambili udida uzulu ingqondo kodwa iziphathamandla zempilakahle kukhansili yedolobho lakoBulawayo zethule umbiko othi kukhanya njalo isimo sibangcono kulabo asebethe bahlolwa batholakala belomkhuhlane weCovid-19.
Umsekeli womqondisi wezempilakahle kukhansili yedolobho lakoBulawayo, uDokotela Khulamuzi Nyathi, uthi kubanganeno ukuphatheka kwalabo abahlolwa batholakala belecoronavirus.
“Okwamanje ungakhangela ireport ephumileyo izolo ithi kulabantu esababamba abangamatshumi amabili lambili. Kulabo, kulabanye esababamba ngoApril abalitshumi lambili. Oyedwa kulabo sewasitshiya kuthi abalitshumi sesabahlola saphindaphinda abaselamkhuhlane, kodwa kuloyedwa laye oselinde ukuba simphinde ukumhlola kodwa kaguli uyazihambela. “Kulinyanga ekupheleni kukaMay ekuqaleni kukaJune silabantu abalitshumi abazihambelayo abalegciwane kodwa phakathi kwabo kulobaba oyedwa ubephatheke kakhulu ephefumula nzima sikesamlalisa esibhedlela seThorngroove samnika ioxygen kodwa kusukela kuthange ubenganeno usephumile esibhedlela useku isolation facility njengomuntu ongaguliyo.”
UNyathi uqhubekele phambili ekhuthaza labo abavalelwe ezindlini ukuba bangasondelelani balondoloze isocial distancing.
''Abantu esilabo koBulawayo abagcinwe endaweni ezehlukeneyo sibamukela ezandleni zeSocial Welfare. Umthetho kahulumende uthi sibahlole ngelanga lakuqala, ngelanga lesifica minwe mibili lalapho sebelamalanga alitshumi lambili lanye. Thina singaziswa ukuthi kulabantu ababuyileyo siyabahlola ngamalanga esawaphiwa nguhulumende njalo umuntu uhlala endlini eyedwa sibakhuthaza ukuba loba behleli sebexoxa bekuquarantine abalandele umthetho wokuthi bangasondelelani.”
Lisiyatshona ilanga ngoLwesithathu, ugatsha lukahulumende lwezempilakahle lubike ukuba eZimbabwe sebengamakhulu amathathu lamatshumi amabili - 320, asebefunyenwe beleCOVID-19, phakathi kwabo abangamakhulu edlula amabili -267 yibo abagulayo.
