Umhlangano wamazwe angezansi kwezwekazi leAfrica owe SADC Extraordinary Summit eHarare ugqitshwe ngoLwesithathu kugcizelelwa udaba lokuthengiswa kwempahla esilungisiwe, ukuqakathekiswa kwabesifazane labontanga lenkuthazo yokuthuthukiswa kwamankampani emhlubulweni wangezansi yeAfrica.
Emazwini akhe okuphawula okusemthethweni lomhlangano eHarare International Conference Centre ngoLwesithathu ekuseni, umgcinisihlalo walenhlanganiso okwamanje umongameli Robert Mugabe utshengise ukukhathazeka phezu kwesimo somnotho emhlubulweni lo.
UMugabe uthi lesi simo asiphathisi isigaba njengoba inengi labantu kungabayanga lanxa kuyisona esithwele inotho enengi kwezenjiwayo ezinengi.
Ukuthengiselana phakathi kwamazwe akulenhlanganiso yeSADC, uMugabe uthi lokhe kungakathuthuki kangako.
UMugabe ugcizelele njalo ukuqakatheka kokuthuthukiswa kwabesifazane labontanga athi bengumgogodla wentuthuko yesizwe sinye ngasinye kulumhlubulo.
Ugqitshwe ngoLwesithathu lumhlangano osungulwe ngoMvulo kuyonale iviki lapho abaphathintambo, inengi labo kuyilabo abezobudlelwano phakathi kwamazwe la labezokuthengiselana esigabeni, bengene umhlangano wokwandulela owalamuhla owenkokheli lo.
Inkokheli zemazweni abalisa ele Angola, Madagascar, Seychelles, Mauritius kanye lele Democratic Republic of Congo bezingekho kodwa zithumele abammeli.
Umongameli Jakaya Kikwete waseTanzania, akasabuyanga ngemva kokubhubha kwesiphathamandla selizwe lakhe uRetired Brigadier General u Hashimu Mbita.
Lumhlangano we Extraordinary Summit ubizwe zinkokheli zamazwe awe SADC ulandela owenzelwe eVictoria Falls nyakenye ngenjongo yokudinga indlela zokuthuthukisa isimo senotho emhlubulweni lo ngokuthengiswa kwempahla isilungisiwe yaphela hatshi lokho okuyikho khona okwamanje.