Ngenxa yokusabala emazweni atshiyeneyo osekwenzwe yinzalo ye Zimbabwe sekutholakala abanye bethandana behlala emazweni ahlukeneyo.
Lokhu kubalula ukuthi abathandanayo laba benelise ukuxoxisana besemazweni atshiyeneyo ngoba sekule nkundla zokuxhumana ebulenjini.
Kodwa ke, kuyasebenza yini lokhu?
Ukuhlaziya loludaba, uGibbs Dube weStudio Seven uxoxe loNkosazana Sisasenkosi Mkandla loMnu.Qinisela Dabengwa.
UDabengwa uthi ngenxa yomumo okhona banye bazithola bethandana kodwa behlala emazweni atshiyeneyo kwesinye isikhathi luvuthe uthando kube lomtshado , kodwa kwesinye isikhathi basala zimathonsi uthando selutshaye omunye inhliziyo kusiya ngokuthi banjani abantu bakhona.
UDabengwa uvumelana loMkandla kodwa esithi abanye sebezithola bethandana lamaqili ayaba esithi kawendanga kumbe ukutshada bona belomkabo emazweni ayabe ehlukene lalawo abahlala khona.
"Kuyabe kusiya ngokuthi umuntu wakhona wadalwa njani. Ulamanga kumbe ngumuntu oleqiniso," kutsho uDabengwa.
UMkandla uthi abanye bayahla isikhathi bethandana kumagagasi kodwa bengakaze bahlangane mathupha.
"Luthando bani lolo olokuthi liyabe lingabonani. Mnyakana libonana ube ususethuka usubona ukuthi ayisuye muntu ebelikhuluma sikhathi sonke," kutsho uMkandla.
