Ukutshengisela kwezizalwane zakwele Egypt lokhe kuqubekela phambili laloba kukhethwe idale lecabinet ngempelasonto, eliqalise umsebenzi ngoMvulo. UMongameli Hosni Mubarak osebuse lelo lizwe okweminyaka engamatshumi amathathu udilize idale lecabinet ngolweSihlanu, wakhetha inhloko kahulumende, lomsekeli kamongameli.
Lokhu kulandela ukutshengisela kwezizalwane zalelilizwe okuqale ngolweSibili ngeviki edluleyo, zifuna uMubarak atshiye isikhundla. UMubarak usetshingise ukunganyikinyeki esikhundleni, osokubangele ukuthi ukutshengisela lokhu kuqhubeke.
Amapholisa akade esekhitshiwe ezitaladeni abuyiselwe namhla. Ngempelasonto ibutho yilo ebelilondoloza ukuthula, njalo kulemibiko yokuthi amalunga ebutho angabe esekela uzulu otshengiselayo.
Kodwa laloba abatshengiselayo bebetshengisela ngokuthula, kulemibiko yokubhidlizwa kwezinye indawo ngamasela lezigangi, kwatshiswa lesigodlo sebandla elibusayo eleNational Democratic Party.
Uhulumende weMelika obikwa esekela umbuso kaMubarak ubikwa esekhuthaze ukuthi uhulumende weEgypt alalele lokugcwalisisa izikhalazo zikazulu.
UBrenda Moyo weStudio 7 ukhulume lengcwethi ecubungula ezombusazwe uMnumzana Walter Nsununguli Mbongolwane ochasisa ukuthi umvukela oseEgypt lo ungabe usitshoni kuzizalwane zeZimbabwe.
