Kunsukwana ezisanda kwedlula kube lembiko ethi amabandla ezombusazwe abalisa ele Zanu PF, lamacele eMDC aphakathi kwenkulumo zokuzama ukubonisana ukuthi inxaki zelizwe zingaxazululwa njani.
Lanxa iziphathamandla zamabandla la zivuma ukuthi kulenkulumo ezenziwayo ibandla leZanu PF lona liyayilandula limbiko.
Uzulu yena udabuke phakathi kumbono walezinkulumo abanye ngabathi zilungele ilizwe ngoba liphakathi kobunzima kodwa abanye ngabathi ukukhulumisana le Zanu PF kufana lokupha lelibandla umpefumulo ngoba seliphelelwe ngumphako.
Ukuhlaziya loludaba uChris Gande weStudio Seven uxoxe lomsekeli wesikhulumeli sebandla le People’s Democratic Party, uMnu. George Mkhwananzi endawonye lonobhala jikelele wenhlanganiso ye Bulawayo Progressive Residents’ Association, uMnu. Ambrose Sibindi.
USibindi osungule linxoxo uthi azincedi lutho lezi nkulumo ngaphandle kwebandla leZanu PF, ngamazwi akhe ethi "Ibandla leli selehlukile, amafekitali ayavalwa okwenza ukuthi lelibandla lidinge ukumanyana lamanye amabandla."
