Inengi lezizalwane zeZimbabwe seziveze ukungabi lethemba lequla lenhlanganiso yomanyano wamazwe abensundu eyeAfrican Union (AU) elizaqala kusasa ukuqapha ukhetho lweZimbabwe.
Inhlanganiso ye AU yazise ukuthi izathumela iqula lamalunga edlula angamatshumi amahlanu azaqala ukuqapha ukhetho kusukela kusasa.
Ngokutsho kombiko owethulwe yinhlanganiso yezizwe zezwekazi lamazwe abensundu eye African Union (AU) amalunga ale inhlanganiso azaqala ukuqapha ukhetho lweZimbabwe kusukela kusasa mhla ka 4 Ntulikazi.
Iqula lakuqala eliqala kusasa ligoqela amalunga amane ahamba lengcitshi kwezokhetho ezilitshumi. Leli qula lizakuba selizweni kuze kube mhlaka 10 Ncwabakazi.
Iqula lesibili elilabazoqapha ukhetho abangamatshumi amane (40) lizaqala ukuqapha ukhethio kusukela mhlaka 23 Ntulikazi kuze kube mhlaka 3 Ncwabakazi.
Lokhu kuzakupha linhlanganiso ithuba lokubona okwenzeka kumalungiselelo okhetho, mhla wokhetho, ukubalwa kwenani labavoti, kanye lokubona ukumenyezelwa kwempumela yalolukhetho.
Leli qula selemukelwe ngokungunguna linengi lezizalwane zeZimbabwe. Bonake baxwayisa inhlanganiso ye African Union ukuthi ingathathi hlangothi ekwenzeni lumsebenzi.
Isizalwane seZimbabwe umnumnzana Aaron Dube uthi imbali yale inhlanganiso kwezokuqatshwa kokhetho lweZimbabwe yenza kube nzima ukuthi bathembele kuyo.
“Bona ma ubabona begqoke amasudu bengena befake amatie eZimbabwe kungathi bazokwenza umsebenzi omuhle kodwanje bona into abazoyenza yikuthi ma befika laphana bazoreporter against ama opposition parties. Basupporter i ruling party. Ngabe iAU imonitwa yi United Nations lama European countries bona babe under bona leSADC ngoba laba bantukudala be failer iZimbabwe,” kutsho uDube
Kantike umgcinisihlalo wenhlanganiso yeZimbabwe Community in South Africa umnumnzana Ngqabutho Mabhena uthi kusemandleni alo iqula le AU ukwenza okuqondileyo.
“Sithemba ukuthi labo abahloli ababizwa ngolwemnzini kuthiwe ngamaobservers bazakwenelisa ukuthi bangene kuma provinces wonke ikakhulu emakhaya kungabi ngabantu abahlala emadolobheni.Bahlolisise ukuthi amarally amapolitical parties atshiyeneyo abanjwa njani,” kutsho uMabhena
Ngakolunye uhlangothi intatheli yeZimbabwe uMxolisi Ncube uthi, iqula le AU kuzafuze lidonse amasokisi nxa lifuna ukuthi umbiko walo wangemva kokhetho wemukelwe yizizalwane zeZimbabwe.
Kutsho uNcube: “Kungabi khona izinto ezifihlwayo kodwa ziyizinto ezibonakeleyo. Bakhulume njalo lezakhamizi ukuze iqiniso livele kakuhle. Ekubathembeni lapha kusuka kube nzima ngoba siyazi ukuthi laba bantu ngabahamba ngemali ethile. Lowo obhadala imali uyabefuna ukuthi owakhe umbono ube yiwo oqakathekiswayo ufakwe phambili sengathi uliqiniso.”
Umeli webandla leMDCT kweleSouth Africa umnumnzana Austin Moyo uthi balethemba lokuthi leliqula alisoke liyangise izwekazi leAfrica.
“Balalele wonke amapolitical parties ukuthi ama concerns abo athini. Lalezi izinto zomsakazo ukuthi laba abangama public broadcaster, babela kanjani isikhathi sokucampaigner kumapolitical parties. Babuke futhi lezigameko zodlame ezingabe zisenzeka emapulazini,” kutsho uMoyo.
Lobanje abanengi bekhombisa ukungayethembi inhlanganiso ye AU, bathi okuthokozisayo yikuthi lonyaka kuzabe kukhona ezinye inhlanganiso ezifana le European Union lezinye ebesisenqatshelwa phambilini ukuzoqapha ukhetho.