Ngenkinga ezibhekana labantu abakhubazekileyo endlebeni bedinga ukufinyelela ezempilakahle eZimbabwe abenhlanganiso emela amalungelo abo eye Deaf Zimbabwe Trust bathi kudingeka inguquko ezwayo engaqeda inkinga ababhekane lazo, ukuze umuntu wonke enelise ukuthola usizo kwezempilakahle ngokulingeneyo.
Abaphila lesimo sokukhubazeka kokungezwa endlebeni bathi babhekana lenkinga ezinengi emizameni yokufinyelela ezempilakahle emakilinika lasezibhedlela.
Lokhu kufakazwa nguNkosikazi Tinotenda Chikunya wenhlanganiso ye Deaf Zimbabwe Trust
“Nxa befuna ukuxoxisana labodokotela ukuba becaze ukuthi babulawa yini kumbe ukuthi kuyini okubuhlungu uthola ukuthi Izibhedlela zethu lendawo zempilakahle azila ma sign language interpreters , labodokotela lama nurse abakhona ngale bayabe bengakwanisi ukuthi bakhulume nge sign language.”
Uqhubeke phambili ethi kuyabadanisa ukuba ilizwe liphakathi kokulwisana lobhubhane lwe Covid 19 lukhulunywa indawo yonke kodwa lokhe lululutshwane ulwazi kundlela eziqonqileyo ezingaphathisa abakhubazeke endlebeni.
“Kubhalwa ngamabala amakhulu afana labo vaccination , head immunity lamanye , so abawatholi amazwi alula njalo abawatholi amazwi nge sign language kube nzima ukuba bazi okwenzakalayo lokuthi bazi ukuthi sesisezingeni liphi ekulwisaneni le Covid 19”
Kungela sign language abantu abakhubazekileyo endlebeni bathi kuba nzima ukuba bakhulumisane lezisebenzi zezempilakahle ezigoqela odokotela labongi bekhululekile ikakhulu ekucasiseni imikhuhlane ehlasele izitho zomzimba ezingasese kumbe ezokwelamisa imuli kuhle. Kuyabe sokudingakala ukuthi bezidingele umuntu ongabasiza ozacina esazi ngemfihlo yabo.
Abe Deaf Zimbabwe Trust bathi baphakathi kokukhankasela indlela zokuqeda loludubo.
“Siyangena kuma clinics lakuma hospitals si traina o dokotela, ama nurse even labe city health department ukuthi nxa bengabe behlangana lomuntu okhubazekileyo kumbe umuntu O deaf ba communicatha laye njani , sibafundisa le disability management training yokuthi bangahlangana lomuntu okhubazekileyo bamncedisa njani.”
UNkosikazi Elizabeth Chidi ongumgcinisihlalo wenhlanganiso emela abazali babantwana abakhubazekileyo uthi sikhuluma kanje balelunga labo elalahlekelwa yimpilo yomntwana esibhedlela ngenxa yokusilela kolwazi olwalungavikela umonakalo onje.
“Umntwana lo wa admithwa esibhedlela engumntwana okhubazekileyo waswela isikhathi sokuthi umzali amnakekele lokungena esiyammunyisa wacina esebhubha esibhedlela.”
Unkosikazi Debra Ncube olomntwana okhubazekileyo uthi okuqakathekileyo yikusabalalisa ulwazi emuntwini wonke.
“Kuyadingakala ukunikeza ulwazi kuma stakeholders onke anikeza ama services ukuthi basebenze njani labantu abakhubazekileyo.Ngitshayela ihlombe Ihlombe I disability policy entsha esanda kulungiswa ethi ku service provider ngainye , kungaba yisibhedlela kumbe I kilinika kube le disability desk ezafundisa abo dokotela labongikazi lezinye izisebenzi ngodaba lwe disability.”
Abakumsebenzi waloluhlangothi bathi kudinga inguquko ezwayo noma izinto seziguquka lapha lalaphaya ngoba uhulumende eselemikhankaso ebasekelayo efundisa uzulu ukuphathisa abakhubazekileyo kakuhle.
Umnyango wabakhubazekileyo kugatsha lokunakekelwa kukazulu ukhuthaza ukuba bengasaleli phandle ekufinyeleleni amalungelo abo okugoqela kwezempilakahle njalo lapha lalaphaya kuba lemikhankaso, kumaphephandaba, emisakazweni kamabonakude eye television lakuradio, ekhuthaza ngalokhu lokuthi kungabi lenkethabetshabi kusiya ngesimo somuntu.