Idale lephalamende eZimbabwe selivotele ukuthi kubunjwe umthetho ozanika umongameli welizwe ukuthi azikhethele abahluleli bedale lomthethwandaba.
Amalunga amenengi ebandla elibusayo labanye abagulayo baze ngobunengi babo ukuzevotela ukuthi kubelomthetho wokunika umongameli amandla okubadinga kulokuthi ancidiswe yikhomishini ye Judicial Services Commission.
Ibandla leZanu PF liqalise nyakenye ukuzama ukuthi kuvotelwe iZimbabwe Constitution Amendment Bill (Number 1) ezakwenza ukuthi umongameli azidingele uChief Justice, umsekeli wakhe loJudge President.
Sokusele ukuthi lokhu kuhanjiswe edale leSenate uMongameli Robert Mugabe engakafaki usiba lwakhe ukuthi kube ngumthetho welizwe.
Kusobala ukuthi idale leSenate lizathathela phezulu iZimbabwe Constitution Amendment Bill le njengoba lilamalunga amanengi akubandla leZanu PF.
Amalunga edale lephalamende akubandla leZanu PF athi akulunganga okubhalwe kusisekelo sombuso welizwe okuveza sobala ukuthi uChief Justice uyenelisa ukuthi adinge umuntu ozathatha isikhundla sakhe nxa esetshiya umsebenzi.
Ibandla leZanu PF lalifuna ukuthi kumiswe ukudinga ozathatha isikhundla sika Chief Justice Godfrey Chidyausiku okwakusenziwa emphakathini njengalokho okumumethwe yisisekelo sombuso welizwe.
Abazi okwenzakalayo bathi lokhu kwenzelwa ukuthi kucentwe indlela yokudinga ozathatha isikhundla sikaMugabe engatshiya umsebenzi.
Nxa iZimbabwe Constitution Amendment Bill ingaba ngumthetho kuzabe kungokokuqala ukuthi kugambelwe isisekelo sombuso welizwe esavunyelwana ngesikhathi kulohulumende womanyano.