UMnu. John Dean, owayemele uMongameli Richard Nixon owaphuma esikhundleni sikamongameli weMelika ngenxa yokungethembeki, uthi okwehlela uNixon kukhanya kusenzakala kuhulumende kaMongameli Donald Trump.
UDean uthi ukulwisana kuka Trump ledale leCongress kunjengalokhu okwenziwa nguNixon ngesikhathi kuhlolisiswa ukugqekezwa kwesigodlo sama Democrats ngababedlelana loNixon kuqhutshwa ukhetho oluqakathekileyo kwele Melika. Lokhu kwaziwa kakhulu ngokuthi yiWatergate Scandal.
Okwamanje idale leCongress lithi uhlangothi lukahulumende oluphethe ezemithetho soluthembise ukuveza ingwalo eziqakathekileyo ezitshengisa ukuthi uTrump wayefisa ukuthi kuxotshwe uMnu. Robert Muller owayehlolisisa ubudlelwano buka Trump lelizwe leRussia ngesikhathi sokhetho ngomnyaka ka2016.
Kulabanye abakubandla lama Democrats abathi ingwalo lezi zizakwenza ukuthi uTrump amiswe edale leCongress athoniswe icala lokuthi wephula umthetho ngokufisa ukuthi kuxotshwe uMuller.
Kodwa-ke abakubandla lama Republicans bathi uTrump kafani ngitsho lakancane loNixon. Bathi amalunga edale leCongress akubadla lama Demcrats bafuna ukuthonisa uTrump ngendlela ephansi.
Ngaphansi komthetho wakwele Melika ukuthonisa umongameli edale leCongress kubizwa ngokuthi yi-impeachment ngeSilungu.
Ukuze sizwe okunengi ngodaba lolu sixoxe loMnu. Den Moyo, ingcwethi kwezombusazwe, othi abanye kubandla lama Democrats abanjengobakhokhelayo edale leCongress, uNkosikazi Nancy Pelosi, kabafuni ukuthi uTrump amiswa edale leCongress ngoba lokhu kungenza ukuthi banqotshwe kukhetho lukamongameli oluzakwenziwa ngomnyaka ka2020.
