Owayengumongameli weMozambique uMnu. Joachim Chisano uthi inkokheli yamazwe awezwekazi leAfrica kumele ifunde ukutshiya umbuso ukuze uzulu athole umbuso okhululekileyo njalo kunanzwa amalungelo oluntu.
UChisano wethule lumbiko ngoLwesihlanu eVictoria Falls evula umhlangano wamagqwetha oweSADC Lawyers Association oqale ngoLwesine. UChisano uthe eyinye inkokheli ifuna ukufela ezikhundleni okwenza ukuthi kube lokunengi okuhlupha amazwe awezwekazi leAfrica okunjengokufumbathisana nxa uzulu edinge okutshiyeneyo kuhulumende. Uthe lokhu kuhlukuluza uzulu njengoba kuyabe sokumele ahlale elemali ukuze athole usizo olungabhadalwayo.
Owaba ngumongameli weMozambique kusukela ngomnyaka ka1986 kusiya kumnyaka ka2005, uthe waziwa ngokuguqula isimo elizweni lakhe elibukwa ngokwenza ukuthi uzulu abeyingxenye kahulumende.
Umhlangano lo ophela kusasa ulesihloko esikhangelane lamalungelo oluntu njalo lokuthi ohulumende kumele basebenze ngendlela efunwa nguzulu. UGibbs Dube weStudio 7 uxoxe loMnu. Lizwe Jamela omunye wamagqwetha adlula amakhulu ayisithupha – 600 – abasemhlanganweni lo.
