HWANGE —
Izulu elinengi eselilamaviki amabili lisina esiqintini se Hwange enhla kwemaNdebeleni selitshiye imizi engaba mithathu ikhukhulwe ngamanzi kanti njalo sokulomonakalo omkhulu emasimini asegejwe yizifula kwasuphuka izilimo ngesikhathi ugatsha lwe Civil Protection Unit luxwayisa uzulu wonke wenhla yemaNdebeleni ukuthi ahlale eqaphele ukukhukhulwa ngamanzi ngoba lisazoqhubeka lisina izulu.
Ukuqala komnyaka ka 2014 kwemukelwe ngenjabulo nguzulu wenhla lezansi yemaNdebeleni oseleminyaka engakaze alibone izulu elinengi njengelalonyaka. Lilihlanganise lonke elikaMthwakazi izulu elaqale ukuna ngaphambi kweKhisimusi njalo ngokwenza lokho, laqinisa amathemba okuthi isivuno salonyaka sizakuba ngcono.
Kodwa abasemangweni we Hwange le Victoria Falls lapho elina khona ukusa kwamalanga sebehlalele evalweni kanti abanengi sebelahlekelwe yimizi, impahla kanye lezilimo osekukhukhulwe lizulu eselileviki lisina phose kathathu ngelanga.
Ukhansila ka Ward 16 e Hwange umnumzana Cosmas Mwakiposa uthi uzulu uyakujabulela kakhulu ukuthola amanzi kodwa usehlalele evalweni ngoba izulu selidale umonakalo lokulahlekelwa phakathi kwesigaba. Ulandisa udubo asebekhangelane lalo ngenxa yezulu.
Uthi abantu sebesesabela ukuthi lonyaka kungaba ngumnyaka wezulu kodwa olendlala ngoba ukwanda kwamanzi kuzacina sekubulala izilimo emasimini. Owake wabangummeli we Hwange West edale lephalamende uMnumzana Jealous Sansole uthi umonakalo omkhulu wempophoma zamanzi wenzeke esiqintini se St Mary's duzane ledolobho leHwange lapho okugcwale khona umfula wakhukhula imizi ethile kanti ezinye izakhamizi zisindile loba zilahlekelwe yimpahla.
Uthi umonakalo omkhulu ubangelwa yikuthi idamu le Kalope okuthela khona lesisifula ligcwale kakhulu amanzi abuyela emuva ayaqhatha indlela entsha okuyiyo ekhukhule imizi. Ngaphandle kwemizi, uthi lelizulu litshiye uzulu ekhala ngokulahlekelwa zindlela zokuziphilisa ngokulima.
Esigabeni esifanayo, imuli yesakhamuzi esichazwe njengo Mnumzana Joseph Ncube ebiyakhe esihlengeni esiphakathi komfula uLukosi ngaphansi kwenduna uNekatambe ihlengwe ngabogatsha lwezokucitsha imililo abe Hwange Colliery Company ngoLwesihlanu kodwa ilahlekelwe yimpahla yonke ekhukhulwe ngamanzi.
Usikomitshi njalo enguye umkhokheli we Civil Protection Unit eHwange umnumzana Tapera Mugoriya uthi imuli ezinengi ezikhukhulelwe imizi esigabeni sakhe sezihlezi lezihlobo kusalindwe ukuthi uhulumende azitholele indawo zokwakha imizi ezigabeni eziphephileyo engozini yamanzi.
Uthi abogatsha lwakhe basebenze kakhulu njalo besusa izihlahla eziwiselwe emgwaqweni ohlanganisa idolobho lakoBulawayo le Victoria Falls. Izalukazi lamaxhegu agcinwe emzini wasebekhulile owe Badala Old People's Home labo bakhutshwe ngesiphithiphithi ngomgqibelo sebebalekiselwa impophoma zamanzi bayaphephela endlini yenkonzo ye Roman Catholic eseduze.
Umsekeli kamqondisi wogatsha lwe CPU unkosikazi Sibusisiwe Ndlovu uthi uzulu kumele aqaphele ukukhukhulwa ngamanzi ngoba lisekhona izulu elinengi okweqileyo. Uxwayise njalo uzulu ukuthi kukhangelelwe ukuthi imifula eminengi emikhulu elizweni izagcwala ngendlela eyingozi kunsukwana ezizayo.
Kunjalo nje, ukuze sizwe okunengi ngokwenzakalayo esigabeni lesi, uChris Gande weStudio 7 uxoxe lowake wamela lesi sigaba edale lephalamende, umnu. Gift Mabhena.
Ukuqala komnyaka ka 2014 kwemukelwe ngenjabulo nguzulu wenhla lezansi yemaNdebeleni oseleminyaka engakaze alibone izulu elinengi njengelalonyaka. Lilihlanganise lonke elikaMthwakazi izulu elaqale ukuna ngaphambi kweKhisimusi njalo ngokwenza lokho, laqinisa amathemba okuthi isivuno salonyaka sizakuba ngcono.
Kodwa abasemangweni we Hwange le Victoria Falls lapho elina khona ukusa kwamalanga sebehlalele evalweni kanti abanengi sebelahlekelwe yimizi, impahla kanye lezilimo osekukhukhulwe lizulu eselileviki lisina phose kathathu ngelanga.
Ukhansila ka Ward 16 e Hwange umnumzana Cosmas Mwakiposa uthi uzulu uyakujabulela kakhulu ukuthola amanzi kodwa usehlalele evalweni ngoba izulu selidale umonakalo lokulahlekelwa phakathi kwesigaba. Ulandisa udubo asebekhangelane lalo ngenxa yezulu.
Uthi abantu sebesesabela ukuthi lonyaka kungaba ngumnyaka wezulu kodwa olendlala ngoba ukwanda kwamanzi kuzacina sekubulala izilimo emasimini. Owake wabangummeli we Hwange West edale lephalamende uMnumzana Jealous Sansole uthi umonakalo omkhulu wempophoma zamanzi wenzeke esiqintini se St Mary's duzane ledolobho leHwange lapho okugcwale khona umfula wakhukhula imizi ethile kanti ezinye izakhamizi zisindile loba zilahlekelwe yimpahla.
Uthi umonakalo omkhulu ubangelwa yikuthi idamu le Kalope okuthela khona lesisifula ligcwale kakhulu amanzi abuyela emuva ayaqhatha indlela entsha okuyiyo ekhukhule imizi. Ngaphandle kwemizi, uthi lelizulu litshiye uzulu ekhala ngokulahlekelwa zindlela zokuziphilisa ngokulima.
Esigabeni esifanayo, imuli yesakhamuzi esichazwe njengo Mnumzana Joseph Ncube ebiyakhe esihlengeni esiphakathi komfula uLukosi ngaphansi kwenduna uNekatambe ihlengwe ngabogatsha lwezokucitsha imililo abe Hwange Colliery Company ngoLwesihlanu kodwa ilahlekelwe yimpahla yonke ekhukhulwe ngamanzi.
Usikomitshi njalo enguye umkhokheli we Civil Protection Unit eHwange umnumzana Tapera Mugoriya uthi imuli ezinengi ezikhukhulelwe imizi esigabeni sakhe sezihlezi lezihlobo kusalindwe ukuthi uhulumende azitholele indawo zokwakha imizi ezigabeni eziphephileyo engozini yamanzi.
Uthi abogatsha lwakhe basebenze kakhulu njalo besusa izihlahla eziwiselwe emgwaqweni ohlanganisa idolobho lakoBulawayo le Victoria Falls. Izalukazi lamaxhegu agcinwe emzini wasebekhulile owe Badala Old People's Home labo bakhutshwe ngesiphithiphithi ngomgqibelo sebebalekiselwa impophoma zamanzi bayaphephela endlini yenkonzo ye Roman Catholic eseduze.
Umsekeli kamqondisi wogatsha lwe CPU unkosikazi Sibusisiwe Ndlovu uthi uzulu kumele aqaphele ukukhukhulwa ngamanzi ngoba lisekhona izulu elinengi okweqileyo. Uxwayise njalo uzulu ukuthi kukhangelelwe ukuthi imifula eminengi emikhulu elizweni izagcwala ngendlela eyingozi kunsukwana ezizayo.
Kunjalo nje, ukuze sizwe okunengi ngokwenzakalayo esigabeni lesi, uChris Gande weStudio 7 uxoxe lowake wamela lesi sigaba edale lephalamende, umnu. Gift Mabhena.