Ezinye izikolo eGwanda sezikhangelelwe ukuthi zithuthuke kwezemfundo kulandela uncedo eziluthole kwabemba igolide lokunye esigabeni lesi.
Loluncedo luza ngesikhathi izikolo ezinengi emaphandleni zibhekane lodubo lwezindlu zokufundela izifundo zeScience kanye lama computers, osekudale ukuthi inengi labafundi ezikolo lezi liphumelele ezifundweni.
Izikolo esezithole uncedo ukuze zithuthukise ezemfundo eGwanda zibalisa iBengo Secondary School yona encediswe yinkampani eyenza isamende eCollen Bawn iPretoria Portland Cement (PPC) kanye leSitezi Secondary School yona encediswa yiBlanket Mine.
EBengo iPPC yakhe izindlu ezimbili zokufundela izifundo zesayensi kanye lamakhomputha njalo yanikeza lesisikolo amakhomputha angamatshumi amabili lanye - 21.
Ekhuluma ngesikhathi esamukela lesisipho kuviki edluleyo uSobhuku weBengo uMnu. Keaboka Magaya uthe imfundo sokumele ithuthuke kulesisikolo ebesingaqhubi kuhle eminyakeni edlulileyo.
"Bengisithi kubantwana besikolo lithuba lenu leli, abadala ngiyababona sekwadluala kibo, lingalidlalisa ithuba leli kalisoze liphenduke ngoba phandle kunzima abantwana bayabulalana emkuteni lamadrugs, kunzima so besikhuthaza abantwana ukuthu bebambelele.”
Lamazwi agcizelelwe ngumqondisi weGwanda Rural District Council, uMnu. Ranganai Sibanda.
"Sikhangelele ukuthi isikolo sethu seBengo Sithole ukuncedakala ngalesisipho esivela kuPPC kuhlanganisela legandi ezabanika inzuzo yokuthi bakhangele ezinye inswelo abalazo esikolo."
Isikolo seSitezi Secondary eGwanda North laso sesivuselelwe yiBlanket Mine njalo laso sizakuba lendawo yokufundela izifundo zesayensi kanye lamakhomputha.
Isakhamuzi seSitezi uMnu. Cone Ngwekazi uthi lokhu kuzadala ukuthuthuka kwezemfundo esigabeni sakhe.
Ngaphandle kwesikolo lesi, iBlanket Mine iphathisa njalo ukuthuthukisa esemfundo yaphansi kanye lekilika kuleyondawo.
Lanxa ezinye izikolo zijabulela izipho ezizitholileyo, esikolo seDambashoko Primary School bona bakhala ezimathonsi ngokuswela amakhomputha.
Umgcinisihlalo wekomidi yabazali besikolo seDambashoko, uMnu. Butholihle Nkala, uthi kuyisifiso sabo ukuthi abantwababo bathole izifundo zamakhomputha.
UMqondisi wePPC kwele Zimbabwe, uMnu. Albert Sigei, uthi bancedisa izikolo zemaphandleni ngoba zisemuva uma kuqathaniswa lezemadolobheni.
Umphathintambo wezemfundo, uMnu.Torerayi Moyo, uthi bazavuleka ingqondo abafundi ngalezizipho.
Ngomnyaka ka2020 isikolo seBengo sathola iqanda ekhulwini - 0% kumihloliso yeOrdinary Level kuthi nyakenye sathola - 7%. Akwaziwa ukuba lonyaka sizaqhuba njani kulandela lintuthuko esikhona esikolo lesi.
Forum