Inhlanganiso eyasungulwa yizizalwane zeZimbabwe emela izisebenzi zakwamanye amazwe kweleSouth Africa, eyeMigrant Workers Union of South Africa (MIWUSA), isebenzisana lamankampani akweleSouth Africa, isibumbe uhlelo lokungcwaba izizalwane zeZimbabwe lezakwamanye amazwe eziyabe zibhubhele kweleSouth Africa.
Inhlanganiso ye MIWUSA ithi isungule loluhlelo olubizwa Heritage Funeral Scheme ngemva kokubona ubunzima obukhulu obuhlangana lezihlobo zalabo abayabe bebhubhele kweleSouth Africa. Unobhala jikelele wenhlanganiso ye MIWUSA, uMnumnzana Mandla Masuku, utshele iStudio 7 ukuthi abafisi kubekhona ongcwatshelwa kwelinye ilizwe ngenxa yokuswela uhlelo olungasiza ngcono.
“Sithole ukuthi kulabantu abanengi abangenawo la amacover. Okwesibili yikuthi kunenkampani ezinye nazo ezenziwe ngaleyo ndlela ukuthi umforeigner kuba nzima ukuthi ayithole icover engeke ize imdlele kakhulu imali.”
Lobanje abanye besithi sezinengi inhlelo zokudlela abantu imali ezibunjwayo, uMnumnzana Masuku uthi akuzukuba lula ukuthi umuntu aqilibezelwe ehlelweni lwabo lolu.
“Sisebenzisana nama companies amakhulu, okudala ukuthi amathuba mhlawumbe okuthi umuntu singamphoxa abe mancane kakhulu.Sisebenzisana ne Ness Consulant, an indeginous company, yase i identifier i underwriter eyiyo futhi enkulu ehlonitshwayo la eSouth Africa iSanlam.”
Isiphathamandla senkampani yakwele South Africa eyeNess Consultant, layo eyingxenye yaloluhlelo, uMnumnzana Thabang Motea uthi ngokubhadalanje imali ephansi kwamaRandi alikhulu ngenyanga, loluhlelo luyathwala lokungcwaba isidumbu yiloba yikuphi.
“Ifuneral scheme le unga cover abantu bala eSouth Africa, and then unga cover abomdeni wakho abaphaya eZimbabwe, ubhadale iPremium enye ozoyibhadalela nge easy pay card alile logo ye MIWUSA. Ubhadala loba kuphi, eShoperite, Checkers loba kuphi.”
Uthi kukhulu okutholwa ngolilunga laloluhlelo.
“Uthola amabenefits amanengi kakhulu, ngenxa yokuthi thina sisebenza ngo cash, kodwa singakwazi ukuku organizela ukuba uthole iservice if yilonto oyifunayo. Umuntu ophetheyo kundaba yepolicy yakho nguwe as a policy holder.”
Isizalwane seZimbabwe uMnumnzana Godknows Sibanda, ngomunye wasebelwemukele ngezandla zombili kuloluhlelo.
“Le yinto enhle kakhulu. Khathesinje nxa kuyikuthi awunaye umasingcwabisane, wena ma ungavuka uthule, kuzomele ubhadale imali efika to R15000, yimali enengi kakhulu leyo, abazali ekhaya le begcine sebethengisa inkomo zabo.”
Ukwanda kwezizalwane zeZimbabwe ezifela kweleSouth Africa sekubangele ukuthi kusungulwe inhlelo ezinengi zokungcwabisana kweleSouth Africa.