Izizalwane zeZimbabwe ezingena kweleBotswana okungekho emthethweni zizithola zibhakane lodubo loncedo ezibhedlela ngoba zingalamaphepha okuhlala aqondileyo. Kodwa inengi lithi uhulumende kakhangelisise isinqumo sakhe ngoba kulenengi elifihla imkhuhlane, licine, kwezinye izikhathi, libhubha.
Uhulumende weBotswana uthi kayelaphi labo abangalancwadi zokuhlala elizweni kukanti amaklinika azimele wodwa noma enceda lapha lalaphayana, ahlawulisa imali engeneliswa linengi, ikakhulu bengabantu bemisetshenzanyana.
Unkosikazi Jenifer Mbuyazwe uthi bayaxotshwa ezibhedlela noma nje umongameli Ian Khama wayethe abongi babelozwelo uma abantu beqinelwe ngumkhuhlane…
AbeBotswana bathi kumele lokhu kukhangelisiswe ngoba kwezinye izikhathi imphefumulo iyalahleka. UJoe Kelapile uthi kungancono abangalancwadi bavunyelwe ukuya ezibhedlela kuthi bengathola uncedo sebengabuyiselwa eZimbabwe…
Kodwa uDenis Makhula uthi abakwesabayo yikuyadinga uncedo, ungalutholi njalo uyabe usuzithengisile, ngoba uzahanjiswa emapholiseni, ubuyiselwe eZimbabwe…
Oyisikhulumi esibhedlela esikhulu sikahulumende esePrincess Marina, uDonnel Kutlapye watshela iStudio 7 kungxoxo edluleyo ukuthi isinqumo sabo ngokungelaphi abangalamaphepha asikaguquki.
Kulokukhathazeka ukuthi njengoba inani labeZimbabwe abaqhubeka bengena eBotswana okungekho emthethweni njalo abanye besebenza emapulazini akude, balakho ukufihla imkhuhlane icine ibaqinela ngoba besesaba ukudinga uncedo ezibhedlela.
