IBotswana isivumile ukuthi ngempela kayiphumeleli empini yayo yokulwisana lokungena kwabe Zimbabwe elizweni okungekho emthethweni.
Noma nje iBotswana isifake ngitsho lamasotsha ukulinda ecingweni olwehlukanisa amazwe womabili, inengi leZimbabwe liqhubeka liseqa okungekho emthethweni ngenani eliphezulu.
Sikhulumanje leli lizwe liqhubeka liphindisela emuva abeZimbabwe abedlula inkulungwane lamakhulu amathathu- 1,300 ngenyanga bengena kulelolizwe okungekho emthethweni.
Kulemizamo efana lokuhlawulisa abangena elizweni okungekho emthethweni, ukunciphisa amalanga okuvakatsha kulabo abangena eBotswana kanye lokwengeza amasotsha emgceleni, kodwa bakha phansi emzameni yabo.
AbeZimbabwe baqhubeka bethululeka ngobunengi bebalekela isimo somnotho esiqhubeka sisiba munyu phansi kombuso kamongameli Robert Mugabe.
IBotswana, phezu kokucela imhlangano lenkokheli yeZimbabwe, isiphelele ngamasu okuqeda uhlupho lolu.
Abanye beBotswana bathi akwengezwe abomvikela abafana lamasotsha kanye lamapholisa emngceleni. Umnumzana Mompati Tlhankane uthi noma nje kulindwa emngceleni, lokhu akwenelanga njalo kumele kwengezwe ikakhulu abebutho…
Kukanti omunye wakhe umnumzana Joseph Tirelo ukhuthaza uhulumende wakhe ukuthi athele ejele abatholakale bengene elizweni okungekho emthethweni esithi ukubahlawulisa akusizi lutho…
OweZimbabwe unkosazana Siphesihle Ndlovu uthi kuyadingeka ukuthi iBotswana iqale ukuba loluhlu balaba abangalamaphepha okuhlala eBotswana, mhlawumbe ingabasebenzisa ezigabeni ezifana lokulima kanye lokwakha lapho abeBotswana abamadolo nzima ukuthatha limsebenzi.
Kodwa umnumzana Mbonisi Madlala yena ubona isixazululo siphakathi kweleZimbabwe hatshi eBotswana. Uthi umongameli Mugabe kumele alungise isimo somnotho, ngokuphazima kweso udaba lolu luyabe luphelile.
Umbono kaMadlala uhambelana loka nduna uTapson Jakalasi osesiqintini seJakalasi emngceleni weBotswana leZimbabwe. UJakalasi uthi sebeqale umkhankaso labanye babo beZimbabwe ukuze balwisane lokudalwa kwamacala kanye lokuquma umngcele okungekho emthethweni.
Kodwa laye uyavuma ukuthi uma isimo somnotho sisala sisonakala eZimbabwe kulutshwana okungaguquka.
Abanye njalo ngabathi eleBotswana lalo kalibe lozwelo lisungule lalo uhlelo olufana lolwenziwe kweleSouth Africa olwamaSpecial Permits, olokwenzela umusa inane elithile labakwamanye amazwe babhaliswe ukuze babe emthethweni basebenze bethuthukisa ilizwe.