Izitolo ezinkulu ezithengisa impahla etshiyeneyo eZimbabwe zibikwa sezikhuphule intengo yempuphu kanye lamafutha okupheka kulandela ukufakwa komthelo empahleni le ethengwa kwamanye amazwe anjenge South Africa le Botswana.
Izakhamizi zako Bulawayo, eHarare, Zvishavane, Gweru kanye le Masvingo zithi intengo yempahla le iqalise ukukhuphuka ekuqaliseni kukaNcwabakazi ngemva kokufakwa komthelo wamafutha lempuphu.
Izakhamuzi lezi zithi intengo yempahla le ikhuphuke nge 50 cents kusiya ku US$1.00. Zithi intengo ye 10kg yempuphu ikhuphuke isuka kumadola edlula amane-$4.56 yaba ngamadola edlula amahlanu-$5.56.
Kuthi-ke imbhodlela ye cooking oil eyi 2 liters ekade iyi $2.05 okwamanje isithengwa nge $3.05.
Isakhumuzi sako Bulawayo uMnu. Mthabisi Dube uthi ukukhuphuka kwentengo le sokutshiye uzulu ethithibele.
Kodwa-ke isakhamuzi seVictoria Falls uNkosikazi Ednar Ndebele uthi intengo yempahla le kayikakhuphuki edolobheni leli.
UMnu. Japhet Moyo, umsekeli kanobhala jikelele we Zimbabwe Congress of Trade Unions uthi lokhu okwenziwa ngabathengisa impuphu lempahla etshiyeneyo kuhlukuluza imuli ezingela mali.
