EleBotswana lithi inani labangene kulelolizwe nyakenye litshengisa ukuthi abe Zimbabwe yibo abanengi kakhulu abangene kulelolizwe ukwedlula abakwanye amazwe ngoba befika phose isigidi esisodwa.
Kumbiko osanda kukhitshwa, uhulumende wakwele Botswana uthi abeZimbabwe abangene kulelolizwe bedlula inkulungwane ezingamatshumi angamakhulu ayithoba minwe mibili, 800,000. Lokhu kuphose kube ngamatshumi amane ezivakatshi zonke zamanye amazwe zabangene eBotswana nyakenye.
Ugwalo olutshengisa inani lezethekeli lukhomba ukuthi umngcele wePlumtree kanye leRamokgwebana yiyo ephithizelayo okudlule eminye imngcele eBotswana.
Lolugwalo luthi kulabantu abayinkulungwane eyodwa abangena eBotswana nsuku zonke bevela eZimbabwe besebenzisa umngcele wePlumtree.
Noma nje iBotswana isithi inani leli likhomba ukuthi abantu laba yizethekeli, isizalwane se Zimbabwe, uMnu. James Hlatshwayo uthi laba ngabadinga imsebenzi ngoba kungela zivakatshi ezingangena ngenani eliphezulu kangaka malanga wonke
Laba ayisibo zethekeli, umbiko awubafakanga kuhle ngoba kuyaziwa ukuthi bangabhala ukuthi bazodinga imsebenzi abasoke ebhoda, kodwa kuyaziwa ukuthi ngabantu abazodinga imsebenzi
Kukanti uCastro Ndlovu uthi inani leli liyibufakazi bokuthi eZimbabwe umumo womnotho awumanga kahle…
Inani leli litshengisa ukuthi umumo umubi eZimbabwe, njalo inani leli ayisilo lodwa ngoba kulabanye abangena ngokweqa ucingo abangazange bebalwe.
Inani labangena kwele Botswana elanyeke lehlile kakhulu lisuka ngaphezu kwezigidi ezimbili nxa kuqathaniswa lomnyaka ka2014 ngemva kokuba eleBotswana liwomise imithetho yokungena kwabantu ibanikeza amalanga amalutshwana.
Isitshengiselo sokuthi inengi lalingasizo sivakatshi zinombolo ezikhomba ukuthi phakathi kwabangu 800,000 abangena eBotswana abangaphezu kwe 700,000 baphindela ekhaya, kungaziwa ukuthi inani labantu eliphakathi laya kuphi.
Kufaniselwa ukuthi phose izigidi ezinthathu zabakweleZimbabwe sezaphuma elizweni ukuyadinga ukuziphilisa emazweni angomakhelwane laphetshaya ngesikhathi umumo womnotho kanye lowezombusazwe ungacaci.
