Izisebenzi zikahulumende zamukela ngenjabulo isithembiso esenziwe ngumqatshi e sokubaholisa amabonus azo ngedola leMelika.
Iholo leBonus lezisebenzi ezinengi elizweni, okugoqela ezikahulumende, likhangelelwe ukunikezwa ekupheleni kwenyanga yonale kaLwezi. Lokhu ngokwakuqala ukuba imali le ibhadalwe ngale indlela kusukela ilizwe laqala ukusebenzisa idola leZimbabwe.
Umqondisi wenhlanganiso yababalisi eyeZimbabwe Teachers Union umnumzana Sifiso Ndlovu ngomunye wabamukele lesi sithembiso ngenjabulo.
“Imibiko ephumayo ethi uhulumende uzisele ukuthi abhadale ibonus nge USD, ungumbiko owamulekekileyo kakhulu. Sikhuthaza njalo ukuthi akungabi liphupho akube liqiniso. Kanti ke engcwadini esiyilobele uhulumende kuviki ephelileyo besivele sikhuthaza lokhu. Siyabonga ukuthi balalele, bakuzwisisa ukuthi izisebenzi zikahulumende zidinga uncedo. Sesizasukumela phezulu nxa sisizwa lokhu sihlangana labo kungxoxo ezilandelayo.”
Umnumzana Antony Majongosi umgcinisihlalo wenhlanganinso yabongi eye Zimbabwe Nurses Association koBulawayo uthi bafisa ukuba ngabe leholo libuya lalo linjalo.
“Sibona i government isithi izosipha ama bonus ethu nge USD, siyakubongela lokhu. Njalo siqhubekela phambili sisithi vele le salary yethu kayibuye isingama USD. Siyabona ukuthi izinto ziyakwela ema shops lathi asisakwanise ukuthi sithenge nge salary yethu ayisayenzi.”
Umnumzana Fortune Jamela unobhala wenhlanganiso yababalisi eye Amalgamated Rural Teachers Union of Zimbabwe uthi lokhu kuveza ukuba uhulumende ulayo imali yaphandle kwelizwe.
“Umgcwephetshi wezomnotho uthi yena nxa e presenter i budget minyaka yonke uthi kulemali enengi eyenziwa lilizwe. Okutshengisa ukuthi imali yakwele Melika ikhona ukuthi izisebenzi zikahulumende zibhadalwe ngayo. Kodwa sibona ifakwa ibe yi bonus, sesizabona ke ukuthi uhulumende uzayi charger ngayiphi i rate njalo uzabapha yini abantu i cash. Lathi sesibona ukuthi uhulumende ulayo imali, kabafake iholo nge USD every month abantu bayithole.”
Umphathintambo wogatsha lwezisebenzi zikahulumende usikhwicamfundo Paul Mavima wenqabe ukuphendula umbuzo wokuba uhulumende setshengisile ukuba uyenelisa ukubhadala izisebenzi zakhe ngemali yangaphandle, kungani bengaphiwa leholo lemali le kuqhubekela phambili. Wedlulisele imibizo kunobhala wogatsha lwezemali esithi nguye okhiphe umbiko wokubhadala iBonus ngedollar leMelika.
Asenelisanga ukuxhumana labogatsha lwezemali ukuba bacacise ngalokhu kodwa embikweni olotshwe ngunobhala wogatsha lwezemali umnumzana George Guvamatanga uchaze ukuba belandela umumo womnotho welizwe, lolungahlaleseki kwesilinganiso sesisindo semali yangaphandle nxa iqathaniswa leyeZimbabwe kanye lendingeko zokunakekela izisebenzi zikahulumende babone kufanele ukuthatha lesi sinqumo.
Ekhuluma lephephandaba leHerald umnunzana Guvamatanga uchaze ukuba imbhadalo yama bonus izakwenziwa kanye njalo lesi sinqumo sivele kuMongameli Emmerson Mnangagwa ngokwakhe. Uchaze ukuba izisebenzi zikahulumende ezile bonus edlula amakhulu ayisikhombisa amadola eMelika-US$700, zizathola eyinye ingxenye ye bonus ngedola lakuleli.
Wengeza ngokuthi laba abakumhlala phansi, umnini mhlalaphansi uyathola amadola alikhulu eMelika US$100, kuthi umkakhe athole amadola angamatshumi ayisitshiyagalombili US$80, abantwana bona bathole amadola angamatshumi ayisithupha US $60. Ugatsha olubona ngesikhwama semali yelizwe lukhangelelwe ukukhipha izigidi ezingamatshumi ayisitshiyagalolunye emali yeMelika (US$90 million).