Umhlangano wezisebenzi zikahulumende lomqhatshi obumele wenziwe ngoMvulo eHarare awusabangakhona.
Lumhlagano ubungowokukhulumisana ngembiko kamphathintambo wezenotho, uMnu. Patrick Chinamsa, othi iholo le bhonasi kalisoze liphiwe izisebenzi okweminyaka emibili ngoba uhulumende engaselamali.
UChinamasa esethula amazwi akhe okuhlaziya ukusetshenziswa kwemali kahulumende phansi koluhlu lwendleko zakhe okomnyaka wonalo wengezelele esithi imali ephiwa izisebenzi phandle kweholo lazo, ama allowances, asezehliswa.
Okunye njalo okucunule izisebenzi zikahulumende yimbiko ethi kuzagunyulwa izsebenzi eziyinkulungwane ezingamatshumi amabili lanhlanu, 25,000.
Ngomnyaka ophelileyo uChinamasa wathi imali ye bonus kayisoze iphiwe izisebenzi kodwa uMongameli Mugabe wathi kumele beyiphiwe lanxa imali ingekho.
UChinamasa uthi nxa izisebenzi zingaphiwanga ibonus kuzalondolozwa imali enengi kakhulu engaphathisa kunhlelo ezitshiyeneyo.
Omunye wenkokheli yezisebenzi kunhlanganiso ekhulumisana lohulumende, eye Apex Council, uMnu. Richard Gundane njalo ongumkhokheli wenhlanganiso ye Zimbabwe Teachers’ Association utshele iStudio 7 ukuthi izisebenzi ezinengi zithukuthele ngenyathelo likahulumende.
