Izisebenzi zemakolotshini lamaUniversities eZimbabwe ezedlula inkulungwane ezilitshumi – 10,000 sezikhalale umsebenzi zikhonona ngokungabhadalwa iholo likaNhlolanja.
Izisebenzi lezi zithi sokwehlule ukukhulumisana ngodaba lolu lohulumende ozibikele sobala ngoLwesihlanu ukuthi akalamali yokubhadala iholo lenyanga ephelileyo.
Zithi umqhatshi uphinde njalo wathi uyehluleka ukudinga imali yokubhadala imali yamabhonasi anyakenye.
Omunye wabamele izisebenzi uMnu. Readforward Dube, umqondisi wenhlanganiso yezisebenzi zemakolitshini eyeZimbabwe Universities and Allied Workers’ Union, utshele iStudio 7 ukuthi zonke izisebenzi zihlezi ngekhaya ngenxa yokuthi kazisela mali yokuhamba emsebenzini.
UDube uthe okusindayo yikuthi iziphathamandla zikahulumende zibethulele umbiko wokuthi uhulumende kalamali yokubabhadala iholo lenyanga ephelileyo loba nje kukhanya esebhadale amapholisa lamasotsha iholo likaMbimbitho.
Iziphathamandla zamakolitshi, asevaliwe okwamanje, ziyalile ukukhuluma ngodaba lolu.
Siyehlulekile ukukhulumisana njalo labaphathintambo bakahulumende ababona ngezemfundo lezenotho uNkosikazi Oppah Muchinguri loMnu. Patrick Chinamasa akade bengaphendulo omakhalekhukhwini babo.
Loba kunjalo, uDube utshele uGibbs Dube weStudio 7 ukuthi kababuyeli emsebenzini uhulumende aze abhadale iholo likaNhlolanja lamabhonasi omnyaka ophelilayo.
