Izisebenzi zeZiscosteel ezingaba yinkulungwane lamakhulu amane – 1,400 zibikwa zikhangelelwe ukuxotshwa umsebenzi ngoLwesibili.
Lokhu kulandela amazwi kaMnu. Patrick Chinamasa umphathintambo kahulumende obona ngezemali otshele idale lephalamende ngeviki ephelileyo ukuthi izisebenzi lezi kumele zigunyulwe kusukela kusasa njengoba iZiscosteel okwamanje ingembi insimbi.
UChinamasa utsho lokhu lapho esethula uluhlu lokusetshenziswa kwemali kahulumende lomnyaka ozayo, iBudget ka 2016, wathi iholo lezisebenzi elingakabhadalwa lokhe likhula loba nje kungela lutho olwembiwa eRedcliff.
Inkampani yaMandiya eye Essar Africa Holdings yalobelana isivumelwano lohulumende esokuvuselela inkampani le kodwa kukhanya engani sisivumelwano lesi sesabekwa eceleni.
IStudio 7 kayenelisanga ukukhuluma ngodaba lokugunyulwa kwezisebenzi loNkosikazi Prisca Mupfumira umpathintambo okhangelane lezezisebenzi eZimbabwe.
UMnu. Benedict Moyo omele izisebenzi zeZiscosteel utshele iStudio 7 ukuthi abazi lutho ngokuphelelwa ngumsebenzi.
"Ngikhuluma nje ngisemsebenzini, angikatshelwa luthu lezisebenzi zonke kazikatshelwa lutho ngokugumyulwa umsebenzi. Asikwazi ukuthi kwenzakalani."