Iziphathamandla zikahulumende womanyano ezitshona zizulazula lomhlaba ziphenduke zilengise izandla sezisebenzise izigidi ezingamatshumi amathathu amadola eMelika enyangeni eziyisithupha ezisanda kwedlula.
Umnu. Tendai Biti umphathintambo wezemali uthi inengi leziphathamandla lezi belihambela ize nje kuthi-ke ezinye zisenza inhambo ezingela mvumo.
Umnu. Biti uthi akusensuku zatshwala ukuthi ayethulele uzulu amagama alabo abazula lomhlaba okungelanzuzo lobanje eseke wacela ukuncediswa kuloludaba nguMongameli Robert Mugabe lenhloko kahulumende uMnu. Morgan Tsvangirai kanye lomsekeli wakhe uMnu. Arthur Mutambara.
Umnu. Masimba Kuchera ingcwethi ecubungula ezenotho njalo engumgcinisihlalo wenhlanganiso ye Zimbabwe Coalition on Debt and Development utshele uGibbs Dube we Studio 7 ukuthi ukwenza kweziphathamandla lezi kungeke kwaphela nxa umongameli welizwe laye engaqhubeka esiya emazweni lezihlobo, abangane kanye lezisebenzi zikahulumende ezinengi.
