Liqhubeka liqansa inani leziphathamandla zamapholisa ezimiswa umsebenzi kweleSouth Africa ngodaba lokuthumba lokunikela ngokungekho emthethweni ezandleni zamapholisa eZimbabwe izizalwane zeZimbabwe ezibanjwe kweleSouth Africa. Abanye balabo abanikelwa ngaleyo ndlela kubikwa bafika babulawa ngamapholisa eZimbabwe. Umphathintambo omutsha wogatsha lwamapholisa umnumnzana Nkosinathi Nhlelo ufunga uyagomela ethi bonke abaphatheka kuloku kuganga sekufuze bayeziphendulela emthethwandaba.
Umphathintambo Nhleko uthi yiloba ngubani owaphatheka kulesi senzo sokuthunjwa lokunikelwa kwezizalwane zeZimbabwe emapholiseni eZimbabwe ngokungekho emthethweni ijele imlindele.
Kulesi senzo kubikwa amapholisa akwele South Africa ayezingela abesethumba izizalwane zeZimbabwe ezidingwa ngamapholisa eZimbabwe. Labo abathunjiweyo kubikwa bebethathwa ngundlu bachatshiswe umcele basiwe emapholiseni eZimbabwe, kantike inengi labo kubikwa bebefika batshaywe umuntu aze afe.
Umphathintambo Nhleko uthi akasoke aphumule baze batholakale bonke ababayingxenye yalokhu kuganga. Kungenyanga ngaki engenile kulesisikhundla usemise umsebenzi umnumnzana Anwa Dramat lo Lieutenant General Shadrack Sibiya, okuyiziphathamandla zeviyo lamapholisa elihlolisisa amacala ohlonzi lwaphezulu, amaHawks.
Khathesike lenhloko yeviyo elihlolisisa amacala adalwa ngamapholisa, umnumnzana Robert Mcbride laye usemiswe umsebenzi ngodaba olufanayo.
Intathelizindaba yeZimbabwe uMxolisi Ncube, yena laye ohlalele evalweni ngenxa yecala abhekane lalo eZimbabwe kuthiwa laye nguye uBaba Jukwa, uthi ukubotshwa kwezigilamkhuba zamapholisa aphatheka ekuthunjweni kwezizalwane zeZimbabwe lezi kuzamenza laye azizwe evikelekile kwele South Africa.
Esinye isizalwane seZimbabwe umnumzana Mlungisi Tshabalala, uthi iSouth Africa yenza isibonelo esihle kakhulu ngaloludaba.
Zifika kutshumi lanhlanu izizalwane zeZimbabwe ebeziphephela kwele South Africa okubikwa zinyamalele kanti abanengi bacabangela ukuthi lazo zanikelwa emapholiseni eZimbabwe zafika zabulawa.
Umkhubalo ongekho emthethweni uvele ngo 2010 kuze kubotshwe zizzalwane zeZimbabwe umnumnzana Witness Ndeya , umnumnzana Shepard Tshuma labangane babo ababili ngoba kuthiwa bangene kweleSouth Africa ngokungekho emthethweni.
UTshumake uthi ngemva kokubotshwa kwabo bathathwa ngundlu basiwa emngceleni weBeitbridge basebenikelwa emapholiseni eZimbabwe wona aqala ukubethesa umlandu wokubulala ipholisa eZimbabwe bengakabalekeli kweleSouth Africa.
UNdeya ubikwa wadojwa esefile umzimba wakhe ukhanya ukuthi udutshulwe amahlandla athile.
Inengi lezizalwane zeZimbabwe kweleSouth Africa likhuthaza umphathintambo wogatsha lwendaba zasekhaya umnumnzana Kembo Mohadi ukuthi laye asungule inhlolisiso ezakwenza kubotshwe zonke iziganga zamapholisa eZimbabwe ancedisana lawe South Africa ukwenza lobu bukliwi.