Uhlangothi lukahulumende olukhangelane lezemithelo olweZimbabwe Revenue Authority (ZIMRA) luthi solulungiselele ukwamukela izethekeli ezivela kwamanye amazwe ezizangena emingceleni eyehlukeneyo ngesikhathi sekhefu leKhisimusi.
Kuvame ukuba lokukhonona ukuthi izihambi ziyaphuziswa emngceleni, ikakhulu ephithizelayo eye Beitbridge kanye lePlumtree.
UMnumzana Bekezela Majokojoko, umphathintambo weZIMRA ekhangele umhlubulo ongezansi kwelizwe, uthi sebelungiselele ukuthi bamukele izihambi emngceleni etshiyeneyo.
Ekhuluma leStudio7, uMajokojoko uthe sebengezelele indawo lapho izihambi ezingathola khona usizo lweZIMRA emngceleni, kuyimizamo yokuthi baphathise abantu ngesiphangiphangi.
Lokhu kuza ngesikhathi kulokukhathazeka ukuthi abantu bachitha isikhathi eside, okungadlula ilanga, belokhe belinde ukuthola usizo emngceleni.
“Njenge ZIMRA sesifake amacebo athile ukuthi siphathise izihambi, ikakhulu emngceleni eyaziwayo ukuthi iyaphithizela. Sizafaka amanye amafastela okuphathisa abantu ukuze kungabi lokuphuza.”
Uthi njalo sebekhulumisane labanye abangaphathisa ukuthi kungabi lokuminyana kwezimota, njalo ezinye izisebenzi zeZIMRA ezikwamanye amahofisi seziceliwe ukuthi ziyephathisa emngceleni.
Ngokukhathazeka ukuthi abatshayeli bachitha isikhathi eside emngceleni belinde ukubhadala umthelo wezimota owe Temporary Import Permit, uMajokojoko ukhuthaza ukuthi abantu basebenzise ama fomu akhona ebulenjini kukhasi le ZIMRA.
“Silakho ebulenjini lapho abatshayeli abanga zenzela iTIP bengakasuki, kuthi bengafika emngceleni baphathiswe ngokuphangisa.”
Kulokukhala njalo ukuthi abanye, ikakhulu abatshayela besuka kweleSouth Africa, kudingakala ukuthi babelencwadi evela emapholiseni etshengisa ukuthi imota yabo kayintshontshwanga, besithi lokhu ngokunye okudala ukuphuza okungadingakaliyo.
UMajokojoko yena uthi lokhu kufunakala kuphela uma imota ingatshayelwa ngumnikazi. Okunhlanganiso yabeZimbabwe abahlala kweleSouth Africa, eye Zimbabwe Community in South Africa, uMnunzana Ngqabutho Mabhena yena usola iZIMRA ngesikhathi eside abantu abasithatha besemngceleni.
“Kumele ukuthi ngabe abantu bayavunyelwa ukubhadalela ama TIP ebulenjini ukuze bahle bafike badlule. Njalo okuphuzisa abantu yikuthi kuyaguduzwa kakhulu ezimoteni, ngabe kubalantu abaqhatshwayo ukuncedisa ukusetsha izimota.”
Ngodaba lokuthi kuhle kubhadalelwe iTIP ebulenjini, uMajokojoko uthi iZIMRA isikusigaba sokulingisa lokhu, kukhangelelwe ukuthi kusebenze esikhathini esizayo, kodwa hatshi kulelikhefu.
Okukhomiti ebona ngokubunjwa kwe Diaspora Policy eseGaborone, uMnunzana Cephas Tshuma uthi okudala ukuphuza emngceleni yikuthi konke kwenziwa uma izihambi zifika ebhoda, kukanti okunye kungenziwa ngaphambilini.
“Okubangela ukuphuza yikuthi bafuna konke ukwenzele emngceleni,. Kumele besebenzise itechnology ukuze kungaphuzisi abantu, okwakho uma ufika emngceleni, kube yikudindisa kuphela.”
Okhangele ukuya ekhaya emalangeni, uMnunzana Mkhululi Moyo uthi ngelanga elitshisa okumangalisayo, kumele kubonwe sibili ukuthi abantu abangcinwa isikhathi eside emngceleni.
“Ohulumende bonke, kumbe ngowe South Africa, Botswana le Zimbabwe kumele bebone ukuthi kulabantu abanengi abaphathisa izihambi emngceleni, ngoba kubi ngempela.”
Akukacaci ukuthi sekusondele ilanga leKhisimusi imngcele ayisoke ivalwe njengokuvame kweminye iminyaka.
Inengi seliqalile ukulubhekisa ekhaya, lentengo yetikiti lebhasi isikhuphuke okwamagama.
IZIMRA kayitshongo ukuthi ikhangelele ukuthi kungene abantu abangakanani ikakhulu besebenzisa umngcele weBeitbridge kanye lePlumtree, yona eyiyo ephithizela okudlula yonke eminye ngesikhathi sekhefu.
Nyakenye, kwangena abantu abedlula ingxenye yesigidi, 523,000 besebenzisa umngcele weBeitbridge ngesikhathi sekhefu leKhisimusi.
Forum