Inkokheli zenhlanganiso ezehlukeneyo zingene umhlangano wosuku olulodwa, owe National Debt Dialogue Series wokubonisana phezu kokungenziwa ukuqeda udubo lwesikwelede selizwe kusetshenziswa indlela ezingathwalisi abantu nzima.
Lomhlangano oqoqwe ngabenhlanganiso ye Zimbabwe Coalition on Debt and Development, wenzelwe eHoteleni ye Harare International Conference Centre lamuhla.
Abekade bekulomhlangano bavumelana ukuba kumele luhluzisiswe loludaba ngokugcweleyo, kwazakale ukuba yakweledwa nini leyo mali, kusenziwa ngubani lokuthi yasebenzani.
Umgcinisihlao we ZIMCODD umnumzana Joy Mabenge utshele iStudio Seven ukuba abangene lumhlangano bakuveze sobala ukuba sikhona isidingo sokuba kwenziwe i Debt Audit okuyiyona ezakubeka sobala ukuba zasebenza kulokho ebezikuthathelwa khona lezi zikwelede.
Wathi uMabhenge kungavela sobala ke ukuba kuyisima kanjani njalo uhulumende engazisebenzisanga ngendlela lezo zimali, labo abazithathayo bazihlawule hatshi uzulu athi usebunzimeni okwamanje.
Lokhu kugcizelelwe ngabaze bemele izisebenzi besebenzelana labe ZIMCODD, ngaphansi kwe Zimbabwe Congress of Trade Unions.
Umnumzana Percy Mcijo oke waba ngumgcinisihlalo we ZIMCODD eminyakeni edlule kodwa esengomela izisebenzi ngaphansi kwe ZCTU ekoBulawayo ungomunye wabakhulume le Studio Seven phezu kwalomhlangano owenziwe phansi kwesihloko esithi ” Towards People Centred Debt Resolution Stratergies in Zimbabwe “. Uthi uMcijo njengezisebenzi kumele uhulumende akhangelisise ukuba zadalwa njani lezi zikwelede njalo ngubani owazithathayo lokuba zenze msebenzi bani kundaba yentuthuthuko yelizwe.
Kungavela sobala ke ukuba kazisebenzanga imisebenzi yentuthuko yelizwe lezo zikwelede ezathathwayo njalo lowo mangenisa ilizwe kizo engafisi ukuzihlawula,u Mcijo uthi kumele asiwe emthethwandaba esetheswa umlandu wokungenisa ilizwe lozulu ebunzimeni.
Umnumzana Reason Ngwenya umgcinisihlalo wesigaba sentshonalanga yasemaNdebeleni enhlanganisweni ye ZCTU uthi njengenhlanganiso kabavumelani lokwenza kukahulumende othatha izikwelede mahlayana, kuphethe sekusiba yizisebenzi eziwuthwalayo umthwalo wokubuyisela izikwelede, bephethe sebephila njengezigqili. Uthi uNgwenya lezo zikwelede zenza izisebenzi ziphethe seziphila njengezigqili ngoba zibekelwa imithelo engaqedakaliyo emizameni yakhe uhulumende ukuhlawula izikwelede azithathayo.
Uxwayisa uhulumende uNgwenya ukuba aqale acabangisise njalo athole imbono yezinye inhlangothi lapho eselomcabango wokuthatha isikwelede hatshi ukwenza intando yakhe njengalokho okwenzakalayo.
Lumhlangano ungenwe zinkokheli zenhlangothi okubalisa amalunga edale lephalamende, abezokholo, izisebenzi, abaze bemele abaphila lobugoga, inhlanganiso ezilwela ilungelo loluntu, abaze bemele izakhamizi ama Residents Association.