Uhulumende wehluleke ukuyazivikela emthethwandaba weSadc Tribunal eNamibia ngoLwesibili kudaba olukhwezwe ngabalimi abamhlophe abathathelwa amapulazi abo.
Abalimi laba bathi bafuna iZimbabwe ixotshwe kuSadc ngokwehluleka ukulandela isinqumo seSadc Tribunal esokuthi ukuthunjwa kwamapulazi abo akukho emthethweni njalo kumele kumiswe.
Abalimi laba batshele idale izizatho zabo zokufuna iZimbabwe ixotshwe kuSadc kodwa uhulumende kenelisanga ukuzivikela ngoba engathumelanga muntu ekuthethweni kodaba lolu.
Abamhlophe laba bafuna njalo iSadc ibize umhlangano wokuhlaziya udaba lokuthathwa kwamapulazi abo nguhulumende. Umahluli wedale uthe uzakwethula isinqumo sakhe kunsukwana ezizayo.
Lanxa uhulumende engatshongo ukuthi kungani engayangazivikela, kusobala ukuthi wekele ngabomo ngoba umphathintambo wezemithetho uMnu Patrick Chinamasa eke wethula imbiko ngomnyaka odluleyo esithi umthethwandaba weSadc Tribunal awukho emthethweni.
Igqwetha uMnu Matshobana Ncube utshele uNtungamili Nkomo weStudio 7 ukuthi ukwehluleka kukahulumende ukuyazivikela kutsho ukuthi umthethwandaba uzakwethula isinqomo eselekelele kubalimi abamhlophe.