Inhlanganiso eboleka amazwe womhlaba imali eye International Monetary Fund (IMF) ithi kayisoze iboleke ele Zimbabwe imali lize libhadale isikwelede salo esesicatshangelwa ukuthi sifika kuzigidi ezingamakhulu amabili zamadollar - $200 million.
Inhlanganiso le ithi okwamanje kusobala ukuthi iZimbabwe ingeke yenelise ukubhadala isikwelede lesi njengoba ithwele nzima ngokudinga imali yokubhadala iholo lezisebenzi.
Iqula le IMF elisanda kuphetha uhambo lwayo eZimbabwe lapho akade lizohlolisisa umumo womnotho welizwe, lithi aliboni kusenzakala ukuthi inhlanganiso le ivuselele ukuboleka iZimbabwe imali.
Umnu. Tendai Biti umphathintambo wezemali utshele iStudio 7 ukuthi uhulumende uzama ngamandla wonke ukubhadala imali ye IMF lezinye inhlanganiso zemazweni.
UBiti uthi ele Zimbabwe liphakathi kokukhulumisana lamazwe lenhlanganiso ezimele zibhadalwe izikwelede ezedlula amabillion ayisitshiyangalo mbili amadollar - $8.1 billion phansi kohlelo lwe- Accelerated Re-engagement Economic Program.
Umnu. Masimba Kuchera ingcwethi kwezenotho uthi iZimbabwe kayisoze yenelise ukubhadala izikwelede zonke ezisinda inotho yelizwe.
