Ekunanzweni kwelanga labaphila lesimo sejwabu elidonda ilanga i-Albinism, ele International Albinism Awareness Day likamhlaka 13 Nhlangula, ele Zimbabwe ngelinye lamazwe elitholakala lilodubo lokubandlululwa kwabantu abaphila lalesi simo noma nje kulemikhankaso engapheliyo yokufundisa uzulu ngalokhu.
Osakhulayo uTafadzwa Maruta umisa utshova eqonda esikolweni. Uthi udonsa nzima ngoba esikolo nguye yedwa olalesi simo seAlbinism osokumenza aze afise ukuba kube lezikolo ezibekelwe abafana laye ukuze efunde ekhululekile kungela bantu abahlala bekhuluma okubi ngaye.
UNkosikazi Tapiwa Marange okhokhela inhlanganiso ye Alive Albinism Initiative laye ele Albinism uthi kuyadanisa ukuba kungenani lenfundiso emayelana lalesisifo esitholakala kuyoyonke indawo isenziwa yinhlanganiso ezitshiyeneyo lokhe abantu bengakaguquli indlela ababona ngayo abantu abalalesi simo:
Isimo lesi sibangelwa yikusilela kokudingakalayo ukuqinisa ijwabu ukuvikeleka kwalo elangeni okucina kusenza ukuba lihlaselwe kubi kucine kuphazamisa lamehlo. Lokhu kwenza kudingakale ukuba umuntu olaso ehlale egcoba amafutha avikela ijwabu lakhe lengowane zokuba avikeleke emehlweni.
Osakhulayo ophila le Albinism uBrian Sithole uthi udubo olukhulu ngolokuthi amafutha anje ayadula okucina kusiba nzima ukuwathola kwabawadingayo:
Uthi okungama tube kwankona kuphela ngemva kwamaviki amabili nje kuphela njalo kungatholakali ezibhedlela lakuma kilinika eZimbabwe.
U Tapiwa uthi balwela ukuba uhulumende laye ake abaphathise ngemithi lakho konke okudingakalayo kulabo abaphila lalesi simo ukuze kutholakale lula.
U Gamuchirai Uzande laye ophila le Albinism uthi ukusebenzelana okunje yikho okudingakalayo.
U Tapiwa uthi inhlanganiso yakhe izama ngazo zonke indlela ukuthenga amafutha ibe isinikeza abaphila lalesi simo kungelambadalo.
Unkosazana Faina Chinyanga omunye wabaphila lalesi simo uthi noma konke kungalunga kodwa bequbekela phambili bebandlululwa akusoke kwanceda ngalutho ethi kuyadingakala ukuba imikhankaso yokufundisana lozulu yengezelelwe.
U Tapiwa uthi ngalinhloso ulubhekise kwele Tanzania lapho azamanyana khona labanye abavela kwamanye amazwe womhlaba emhlanganweni wemfundiso owenziwa mhlaka 17 kusiya ku 19 kuyonale inyanga kaNhlangula.
Ele Tanzania ngelinye lamazwe alenkinga enkulu yokubulawa kwabantu abaphila leAlbinism osokuluhlupho osolusabalale lwafika lakomakhelwane e Malawi.
Uhulumende we Malawi usethethe amanyathelo agoqela ukwethula umthetho ovikela izehlakalo zokuhlukunyezwa kwabaphila leAlbinism ngemva kokutshengisela lokwethulwa kwezikhalazo zabantu abalesimo lesi edale lephalamende kulelo lizwe, kanye lokuvala imisebenzi yenyanga ezikhuthaza ukusetshenjiswa kwezitho zomzimba zabantu abale Albinism.
Uhulumende we Zimbabwe ubikwa ekhuthaza ukuba imithi ye jwabu itholakale lula kodwa ethi ulenkinga yokusilela kwemali ukuba lokhu kufezeke. Kubikwa kulabantu abedlula inkulungwane ezilitshumi lasikhombisa-17 000 abaphila le Albinism eZimbabwe.
