Uzulu weZimbabwe ubuthene endaweni ezehlukeneyo zelizwe enanza ukufikisa iminyaka engamatshumi amathathu lasithupha ilizwe lathola uzibuse ngoMvulo mhlaka 18 Mabasa.
Umongameli Robert Mugabe ukhokhele umkhosi omkhulu owenzelwe enkhundleni yeNational Sports Stadium eHarare.
Uzulu ubevungama lapho umongameli Mugabe afike enkundleni yeNational Sports Stadium emkhosini omkhulu wokunanza, iminyaka engamatshumi amathathu lasithupha iZimbabwe ithole inkululeko.
Ubengekho umkamongameli, uNkosikazi Grace Mugabe, njengoba engekho elizweni, waphelekezela indodakazi yakhe ebisikhulelwe, ebikwa ibusiswe ngengane engumfana kwele Singapore lapho aye belethela khona.
Ubepholile uMugabe lapho esethula umbiko wakhe kulomkhosi, wokunanza iminyaka engamtshumi amathathu lasithupha ilizwe lathola uzibuse, obumumethe amazwi wokwakha hatshi ukuthukana njengalokho abesejwayele ukukwenza.
Uqonqosele ukuqakatheka kokulungisisa imigwaqo ephuma isiya kwamanye amazwe, esikusimo esibi, wathi kungalesi sizatho uhulumende ekubone kumqoka ukuba ayilungisise, okwamanje sekutholakale imali yokuqhuba lowo msebenzi kulo oxhumanisa i Harare le Beitbridge kanye loya e Chirundu usuka e Harare njalo.
Wengeza ethi sekunganeno kumankampani njengoba ekhona asethe avuselelwa kodwa ubengakulaleli konke lokho uzulu, ezibangela umsindo.
Kube lokuxokozela ngesikhathi esethula umbiko wakhe lapho omunye wabesifazane emane wamemezela ukuthi ufuna ingxenye yakhe ye$15 billion ebikwa yanyamalala ngemva kokuthengiswa kwamatshe aligugu amadayimani.
Intathelizindaba kazanelisanga ukukhulumisana laye owesifazane lo njengoba ehle wathathwa ngabezomvikela ngesiphangi phangi kulesi sehlakalo esenzakale ngokuphazima kwelihlo.
Uze ngobunengi uzulu lanxa inkundla beyingagcwalanga kangako, abanengi bevalelwe phandle, ngemva kokuba uMugabe esengenile.
Kabazange bazihluphe ukuzaphatheka kulomkhosi abamanye amabandla aphikisayo ngaphandle kukamayor we Harare obekhona kanye lenkokheli zengatsha zikahulumende, abammeli bakwamanye amazwe eZimbabwe, kanye labalandeli bebandla leZanu PF.
Bekulemicimbi cimbi ebisenziwa ukulibazisa uzulu okubalisa abaculi abagoqela uSulumani Chimbetu, uJah Prayzer kanye labo abakubutho abekade befola.
