Emdlalweni walo wakuqala womncintiswano womdlalo wenguqu oweCHAN odlalelwa kwele Rwanda, iqembu elimela iZimbabwe elama Warriors lidliwe one kazero ngele Chipolopolo elimela iZambia esibayeni sikaGroup D.
Kodwa ke umgadli weqembu elimela isizwe emdlalweni wenguqu uKnox Mutizwa ubethe isifiso sabo ngesokufika ku final eyomncintiswano lo, owe Chan oqale ngoMgqibelo odluleyo kwele Rwanda.
Iqembu le Zimbabwe likusibaya sika Group D ndawonye le Zambia, iMali kanye le Uganda.
IZimbabwe idlale umdlalo wayo wakuqala ngoLwesibili lapho elingqikilane lele Zambia ladliwa 1-0.
Amaqembu akusibaya sika Group D adlalela enkundleni yeUmuganda njalo emdlalweni walo wesibili iqembu le Zimbabwe lizadlala lele Mali ngoMgqibelo ngehola lesithathu lumdlalo ulandelwe ngozakuba phakathi kwe Zambia le Uganda ngehola lesithupha ntambama.
Imidlalo yokucina eyesibaya sika Group D izakuba khona ngoLwesithathu mhla zimatshumi mabili lesikhombisa lapho iqembu le Zimbabwe elizadlala khona lele Uganda kuthi ele Zambia lidlale lele Mali.
Amaqembu amabili okuyiwo azaphutsha imidlalo yezibaya ehlezi kundawo ezimbili eziphezulu yiwo azadlulela esigabeni esilandelayo esama Knock-out.
Ekhuluma phambilini kokuphakama kweqembu lesizwe lisiya eRwanda, umgadli weqembu le Zimbabwe uKnox Mutizwa uthe yena ulethemba ukuba iqembu leli lizakwenza kuhle kakhulu kulumncintiswano.
Sikhangelele ukwenza okuphezu kawalokho okwenziwa ngabafowethu abafika ku semi-final thina sifike ku final njalo uNkulunkulu esiphathise siphakamise inkezo.
Kumcintiswano oqhutshelwe kwele South Africa ngomnyaka ka 2014 iqembu le Zimbabwe liphutshe likundawo yesine ikanti iqembu elaphakamisa inkezo ngele Libya lona elinqobe ele Ghana ku Final.
Kundawo yesithathu kube leqembu le Nigeria.
********************
Iqembu elimela ilizwe emdlalweni kakhilikithi liphethe amagabha avuzayo ngase Middle East njengoba selidliwe kumidlalo emibili liqembu le Bangladesh eyohlobo lwe Twenty20.
Emdlalweni wakuqala ngoLwesihlanu iqembu le Bangladesh linqobe ngama wickets amane kwathi emdlalweni wesibili ngeSonto iqembu leBangladesh linqobe ngama runs ayi 42.
Kusele imidlalo emibili eyohlobo lwe Twenty20 okumele idlalwe yilawamaqembu njalo iqembu le Zimbabwe sekumele lizame ukuba imidlalo iphele lilinganisile linqobe kabili lele Bangladesh lalo linqobe kabili.
Umdlalo wesithathu ukhona ngoLwesithathu kuthi owesine njalo ungowokucina ukhona ngoLwesihlanu.
Iqembu le Zimbabwe lisanda kubhaxabulwa liqembu elingumthatshuzwa wamanye amaqembu ele Afghanistan ensukwini ezedluleyo kumidlalo eyohlobo lwe One Day International kanye leye Twenty20.