Izikolo zaseZimbabwe, zivulele amasango abantwana bonke kuhlandla lesithathu lokuvulwa kwazo, kodwa lokhu kwenzakale kulokuxokozela okumangalisayo, ngoba ababalisi abavele bala ukuya emsebenzini izikolo zivulwa okwehlandla lakuqala ngoMpandula, lokhu bengekho, bekhala ngokuthi iholo labo aleneli khona ukugada besiya emsebenzini.
Abaphindele esikolo kuhlandla lesithathu lokuvulwa kwezikolo okuqale ngoMpandula ngabantwana bebanga laphansi abasanda kuqala isikolo abe Early Childhood Development (ECD A lo B), abantwana bakagrade one kusiya kugrade 5 labakuSecondary kuForm 1 kusiya kuForm 2.
Ezikolweni ezimbalwa ezisemzini weWarren Park, Westlea lase Kuwadzana, eHarare, ezethekelelwe yiStudio 7 abantwana abanengi bebebonakala bezula zula bengela babalisi bokubafundisa. Ababalisi bemba phansi ngenduku besithi kabasoze babuyele ezikolo nxa uhulumende engalungisanga udaba lweholo.
Abazali esikolo seWestelea primary school abakade bephelekezele abantwababo ezikolo bathi kuyadanisa ukuba uhulumende uvule ezikolo khona kusobala ukuba izikolo kazilidendelanga iziqondiso zokulwisana lomkhuhlane we Covid-19.
Omunye wallaba bazali unkosikazi Chido Maramba uthe ubephekezele umntwana ofunda kuhlandla laqala lomnyaka u grade 1, esithi uzacina ebuyela lomntwana endlini ngoba kungela babalisi.
“Abazali bebebisela abantwana ezindlini, besithi nxa kungela babablisi ngeke batshiye abantwana ngoba bengaklinyazwa. Thina simelele umphathi ukuba asitshele ukuba abantwana ngeke beqhubeke befunda bebanengi kangaka. Kungakho usinike aamalanga okubisa abantwana ezikolo”
UNkosikazi Lucia Phiri olomntwana ofunda e Kuwadzana primary school, uthi akula ndlela zokuvikela umkhuhlane we Covid-19 kulesisikolo.
“Bekungela social distancing. Bekungela ama sanitizers okugcoba izandla. Abantwana bebethathwa itemperature kuphela bengene kungela babalisi bokubanakelela. Sikhuluma nje ezambuzini kakulamanzi, ngabe bayalungisa udaba lwamanzi”
Omela inhlanganiso yababalisi eye Amalgmated Rural Teachers Union of Zimbabwe (ARTUZ), e Matebeland North, uNkosikazi Melissa Chingwanangwana uthi izikolo emhlubulweni weMandebeleni bezingela bababalisi.
“Bekumele kube lilanga lokuba abantwana bonke babesesikolo. Ababalisi lokhe beme ngesinqumo sabo sokuthi ababuyeli esikolo nxa bengaphiwanga iUS520”
Umpathintambo wezemfundo uMnu Cain Mathema,utshele i Studio 7 ukuthi yena ngokwazi kwakhe izikolo zivuliwe kungela nkinga abantwana bebekhona ezikolo njalo lokuthi kulabanye abangenelisanga ukuya esikolo ngenxa yokungabi khona kwababalisi akala lwazi ngalokho.
UMatema utshele njalo iphephandaba leHerald ukuba uhulumende uphakathi kokuqhatsha ababalisi abanengi ukuze abantwana babe ngamatshumi amathathu ekilasini eyodwa.
Njengendlela yokuvimba ukuminyezelana kwabantwana kumele babe semakilasini bebalutshwane. Ngakhoke uhulumende ukhuthaza izikolo ukuba zifundise abantwana ekuseni abanye emini. Ezikolweni ezingela mali yenhlelo zokuvimba ukuthelelanwa kwegcikwani leCovid 19, uthi uhulumende uzaphathisa ngemali evela esikhwameni sokuulwisana laleli gcikwane.
Izikolo zivule ihlandla lakuqala ngoMpandula ngabantwana abaloba imihloliso kaGrade 7, Form 4 lo form 6. Kuhlandla lesibili kubuyele esikolo abantwana abaku Grade 6, form three lo form 5 ngenyanya edluleyo.
Izikolo besezile nyanga eziyisithupha zivaliwe kusukela ngoMbimbitho lapho kuqhamuka iCovid 19, njengendlela kahulumende yokulwisana lomkhuhlane lo.
