Umanyano weEuropean Union uthi umumo wezinto eZimbabwe awukalungeli ukuba wesule izijeziso owazifakela uMongameli Mugabe labanye bakhe kubandla leZanu PF.
Obona ngobudlelwano bamazwe eEurope lezwekazi leAfrica uMnu Nick Westcott, yena ophakathi kokwethekelela eZimbabwe uthe izijeziso lezi zizasuswa nxa uhulumende womanyano engagcwalisisa isivumelwano seGlobal Political Agreement.
Uthe wazise loMongameli Mugabe ngokufanayo emhlanganweni awenze laye ngoMvulo.
UMnu Wescott uthe kulengqubelaphambili ayibonayo kwezomnotho welizwe lanxa nje kusakunengi okumele kulungisiswe ukuze kuthuthukiswe impilo kazulu.
UWestcott uhlangane njalo lenhloko kahulumende uMnu Morgan Tsvangirai, umpathintambo wezemali uMnu Tendai Biti, umphathintambo obona ngobudlelwano beZimbabwe lamanye amazwe, uMnu Simbarashe Mumbengegwi kanye lomgcinisihlalo weZanu PF uMnu Simon Khaya Moyo.
Ingcwethi ecubungula ezombusazwe uMnu Effie Dlela Ncube uthe uyalisekela inyathelo lamazwe eEurope lokuthi izijezisolo zihlale zikhona kuze kulungisiswe konke okuhluphayo kuhulumende womanyano.
