Izihambi ezinengi ezikade zifisa ukuya emaphandleni zibikwa zisehluleka ukugada amabhasi ezilindweni ezitshiyeneyo emadolobheni anjenge Harare lako Bulawayo ngenxa yokukhuphulwa kwembhadalo yokugada ngesikhathi sekhefu le Khisimusi.
Abanikazi bamabhasi babikwa bekhuphule imbhadalo yamabhasi asuka eHarare esiya eMutare ngamadola amane eMelika isuka kwayisithupha.
Imbhadalo yamabhasi asuka eHarare esiya koBulawayo ikhuphuke isuka kumadollar alitshumi lambili isiya kwangamatshumi amabili.
Lokhu sokutshiye abantu abanengi bethithibele ezilindweni zamabhasi bengazi ukuthi bazenelisa ukuyafika emaphandleni kungakafiki ilanga leKhisimusi.
Kusenjalo, abantu makhaza eHarare lako Bulawayo bathwele nzima ngokuswelakala kwezimota ezithwalayo emalokitshini atshiyeneyo.
Amapholisa athi asebambe imota ezedlula inkulungwane ezingelamaphepha aqondileyo okusebenza emadolobheni. Lokhu sokwenze labo abalamaphepha aqondileyo ukuthi bakhuphule imbhadalo yemali yokugada izimota.
Isikhulumeli samapholisa uSuperintendent Andrew Phiri uthi imota ezingela maphepha zibanjelwa ukuthi kungabi lengozi ezinengi emigwaqweni lonyaka ngesikhathi sekhisimusi.
Umnu. Liberty Bhebhe ingcwethi kwezokuthuthukisa uzulu uthe amanye amapholisa ahle ayeqela phezulu esezwe ukuthi sokumele abambe izimota ezingelamaphepha asemthethweni njengoba elakho ukwenza imali enengi lonyaka yokufumbathiswa.
