Abantu abangaba ngamakhulu amabili babikwa bethwele nzima egcekeni lendizamtshina eleGatwick International Airport lapho indizamtshina ye Air Zimbabwe ebanjwe khona ngoMvulo yinkampani ye American General Supplies ngenxa yokungabhadali isikwelede esedlula kancane isigidi samadola eMelika.
Abakade bemele ukugada indizamtshina le abakade belokhe bese Gatwick ngolweSithanu babikwa bebengela kudla, imithi lokunye okufunakala nsukuzonke njengoba iziphathamandla ze Air Zimbabwe zibikwa zibalekile emahofisini awegcekeni lendizamtshina eLondon.
Abantu laba baze bacina benikwa ingubo zokwembatha ngoLwesibili ngabe Gatwick International Airport.
Ugatsha olubona ngezokuhambisa lemigwaqo eZimbabwe, abaqondisi be Air Zimbabwe kanye labe American General Supplies babikwa bekhulumisana ngokubhadalwa kwesikwelede lesi.
Umphathintambo wezemigwaqo uMnu. Nicholas Goche kanye labaqondisi be Air Zimbabwe balile ukukhuluma ngodaba lolu loba nje kulembiko ethi isitholakele imali yokubhadala isikwelede se American General Supplies ethengisele inkampani le insimbi zokuvuselela indizamtshina.
Omunye walabo abathwaliswe amagabha avuzayo eGatwick International Airport nguMnu. Ezra ‘Tshisa’ Sibanda. USibanda ongumsakazi olodumo otshele iStudio 7 ukuthi iziphathamandla ze Air Zimbabwe kazibenzeli lutho.
Abantu laba babikwa becine behlaliswa ehoteleni eseduzane le Gatwick ngolweSithathu njalo lokuthi isitholakele imali yokubhadala isikwelede se General Supplies.Bakhangelelwe ukusukuma belubhekise eZimbabwe ngoLwesine.
