Izifundi ze O le A-level ezedlula zinkulungwane ezilikhulu-110,000 zibikwa zehlulekile ukubhadala imali yokubhala imihloliso yenyanga kaLwezi ngoba abazali bengelayo.
Iphephandaba leHerald libika ukuthi phakathi kwezifundi ze O-level ezizinkulungwane ezingamakhulu amathathu 300,000, kubhadale izifundi ezizinkulungwane ezilikhulu-100,000 kuphela.
Phakathi kwezifundi ze A-level ezizinkulungwane phose ezingamatshumi amane-38,000 inkulungwane ezedlula ezilitshumi-11,000, zehlulekile ukubhadalela imihloliso.
Isifundo esisodwa sibiza amadollar alitshumi eMelika kusiya kwangamatshumi amabili. Kulabo asebephuzile ukubhadala kulenhlawulo yamadollar eMelika amahlanu.
Inhlanganiso zababalisi ezithi iZimbabwe Teachers Association –ZIMTA leProgressive Teachers Union of Zimbabwe PTUZ ziyavumelana ukuthi abantwana abanengi bazakwehluleka ukuloba imihloliso lonyaka.
Ukuze sizwe ukuthi ukwehluleka kwezifundi ukubhadalela imihloso kutshoni kwelakusasa lazo uBrenda Moyo weStudio 7 uxhume isiphathamandla senhlanganiso yababalisi eye Progressive Teachers Union of Zimbabwe, uMnumzana Vusumuzi Mahlangu.
