Abeqembu labesifazane abalitshumi lasithupha - 16, abadabuka eZimbabwe asebehlala kwele Australia, eleCreative Passionate Women, sebembise izibholane ezimbili, zokusiza abahlali bemalokitshini eTshabalala leNtumbane koBulawayo.
Amakhosikazi la ahlala edolobheni lePerth bahlangane ngenjongo yokubuthanisa imali yokuphathisa kunhlelo zokutholisa abantu amanzi ikakhulu edolobheni lakoBulawayo lapho akhulela khona.
UNkosazana Rose Ndimande, omele omama laba, uthi benza lokhu ngenxa hokuthi kawatholakali amanzi koBulawayo.
"Ngo June 2020 kwabalohlupho olukhulu olwamanzi ekhaya ko Bulawayo eZimbabwe . Kwasithinta kakhulu singomama njalo siyinzalo yeZimbabwe saxoxisana ngodubo lwamanzi oluko Bulawayo. Into eyasihlukuluza kakhulu yikuzwa sokulomkhuhlane wesihudo, owawusuthatha lemphefumulo yabantu bakithi."
UMaNdimande uthe sebehlangene bazipha igama baqala ukubuthanisa imali.
"Ehh iqembu leli labomama ibizo lalo kuthiwa yiCreative Passionate Women esayifoma ngo June umnyaka ka 2020. Sayenza ihigh tea ngoJune sanxusa icommunity yethu ye Zimbabwe ekhonapha ePerth, savumelana njalo ukwenza enye ifund raising esayenza ngoOctober iAfrican dinner."
Izakhamizi zijabule okwamagama.
UMnu Edward Nkomazana, ohlala eTshabalala, uyakuthakazelela okwenziwe ngabesifazana laba.
"Ngithi mina ukuzala yokuzimbela. Laba abantwana bethu abase Australia abasenzele okukhulu kangaka angikwazi ukuthi ngingababonga ngemlomo emingaki. Uyakwazi unkulunkulu ulamandla mfanami ngoba lento ibeyisimanga kithi bahle bawugebha phambi kwegeli lami. Lapha amanzi lapha besingela nkethabetshabe ngoba amanzi wona ngokwawo kawancitshanwa esintwini."
UNkosikazi Tee Mpofu, esinye njalo isakhamuzi seTshabalala, ngomunye wabamukele ngentokozo uncedo lwamanzi.
"Ngiyajabula kakhulu ngamazi la engiwabona lapha. Besilohlupho kakhulu nxa amanzi evaliwe sihamba sicela ema church nxa amanzi evaliwe labo kade besenzela umusa abantu benkosi besinika kodwa iline yakhona ibenkulu asiphilanga lemizimbeni silayine uze uyefika lapha okukhiwa khona amanzi. Khathesi sesithaba sibili lembhida sengizayilima sengikwazi ukuthi hawu sokulamanzi sibili amanengi eduzane."
UMnu. Albert Ndlovu, okunhlanganiso yezakhamizi eyeTshabalala Residents Association, uthakazelela uhlelo lolu. "Ngithanda ukubonga omama abe Australia. Bengo bazwele abantu abangomama eTshabalala ekade behamba almost 7 to 10 kilometres bedinga amanzi ,bevuke ekuseni up to ntambama bedinga amanzi ngoba besisiba le shortage yamanzi yokuthi almost 1 month yonke to 2 months kungalamanzi ,kungala drop yamanzi but as of now njoba sidriller ngikukhangele ukuba irig isikhona la."
Izakhamizi zakulezindawo zithi zizavikela ukubhidlizwa kwezibholane lezi lokuthi zingatshontshwa.
UMnu Godfrey Dube uthi bazimisele kulokhu.
"Mina ngikhona futhi ehlangothini lwamapholisa ngingu chairman we-tripple CCC okutsho ukuthi Crime Consultative Committee eTshabalala police station. Siloku patroler ebusuku sikhangela indawo yethu ukuthi ilokuthula na? So sizazama ngendlela zonke ukuthi indawo leyi siyigcine ngoba yonke into ephila emhlabeni iphila ngamanzi. Umuntu olemali longela mali nxa engasela manzi kala mpilo."
Izakhamizi zakoBulawayo zihlezi zikhathazekile ngodubo lwamanzi wona asekhanya eseligolide kuleli dolobho kodwa abadabuka koBulawayo behlala eAustralia abeCreative Passionate Women sebenze abahlali beNtumbane leTshabalala baklamase, babobotheke bejabula ngamanzi asezatholakala eduze, ezibholaneni ezembiweyo. Amanzi yimpilo.
