Inkampani kagetsi eyeZimbabwe Electricity Supply Authority (ZESA) ithi isisindwa yisikwelede eyasithatha iqhelisa isititshi samandla kagetsi eseHwange unit 7 le 8 kanye lezokuthenga ugetsi kwamanye amazwe, ezibiza amabhiliyoni amabili amadola eMelika - US$2 billion.
Osaphethe isikhundla somqondisi walinkampani uMnu Eliab Chikwenhere utshele ikhomithi yedale lephalamende ebona ngendaba zamandla kagetsi ukuba linkampani iyehluleka ukutholisa uzulu amagetsi eneleyo, ngenxa yenhlupho ebhekane lazo, ezigoqela ukungahlaliseki kwesisindo semali yelizwe, izikwelede, ukwanda kwamankampani amatsha emba amatshe aligugu lokunye.
Lokhu sekubangele ukuba indawo ezinengi ziswele amagetsi njalo amanye amabhizimusi lamankampani esevala kumbe ukwehlisa izinga lokusebenza kwawo.
Inkampani emba iplatinum eyeZimplats, ikhuphe umbiko kuyonaliviki isithi isiqale uhlelo lokwehlisa inani lezisebenzi zayo ngenxa yomumo wenotho ongamanga kuhle eZimbabwe kanye lokwehla kwentengo zeplatinum.
Ingcwethi ecubungula ezenotho njalo engumbalisi ekolitshini leNational University of Science and Technology - NUST, uMnu Stevenson Dlamini uthi udubo lolu luzaphazamisa ukuthuthuka kwenotho yelizwe.
Forum