Banengi abantu abathi inhlanganiso yeSouthern African Development Community kumele ingenele kokwenzakala eZimbabwe lapho amapholisa abhaxabula khona abatshengisela ezitaladini bekhonona ngesimo esibi somnotho lokubusa kukaMongameli Robert Mugabe okusolwa nguzulu.
Kulokuvumelana phakathi kwamabandla abusayo, abantu makhaza lenhlanganiso ezizimele zodwa ukuthi iSADC kumele ihlafune udaba lweZimbabwe njengalokho okwenziwa ngowayengumongameli weSouth Africa uMnu. Thabo Mbeki ngomnyaka ka2008.
UMbeki owayengumlamlankunzi edabeni lweZimbabwe kungakangeni uMongameli Jacob Zuma esikhundleni sakhe, wahlalisa phansi amabandla eMDC leZanu PF okwenza ukuthi kubunjwe uhulumende womanyano ngomnyaka ka2009.
Okwamanje ukuxokozela eZimbabwe sokusezitaladini lapho abantu makhaza abathi sebefuna uMugabe aphume esikhundleni besithi useyehlulekile ukubusa uzulu. Labo abatshengiselayo bathwaliswe nzima ngamapholisa.
Kambe kuyini okungenza ukuthi iSADC ingenele eZimbabwe? Ukuze sihlaziye udaba lolu, iStudio 7 ixoxe loMnu. Mlamuli Nkomo, ingcwethi kwezombusazwe ezimele yodwa, loMnu. Joseph Tshuma, omele iPelandaba leMpopoma kudale lephalamende ekubandla leZanu PF. UNkomo usungula loludaba.
UNkomo uthe iSADC ilakho ukungenela eZimbabwe nxa kungaqhubeka ukuxokozela elizweni njalo eleSouth Africa selihlutshwa yiziphepheli ezivela kwele Zimbabwe.
