Izakhamizi zeVictoria Falls zikhala ngokuvalelwa amanzi yikhansili besithi lokhu ngokunye kwezizatho ezibangela ukuba umkhuhlane wohudo umemetheke ngamandla esigabeni seHwange lapho othwalise nzima khona abantu.
Ikhansili le yasungula ngoLwezi nyakenye ukuvalela izakhamizi ezingahlawuli ngemfanelo imalii yamanzi loba umemetheka umkhuhlane wohudo esabelweni seMatabeleland North, ikakhulu eHwange.
UMnumzana Gambiza Zivai omunye wabahlali uthi ingcekeza ebangelwa yikuswelekala kwamanzi ezindlini ezinengi yiyo ememethekisa umkhuhlane lo.
"Esikufisayo yikuba ikhansili izwele abantu besivulele amanzi, bebuye njalo babuthe izibi sengcekeza ngesikhathi."
Amazwi esakhamuzi lesi agcizelelwe njalo ngumgcinisihlalo weVictoria Falls Combined Residents’ Association, uMnumzana Kelvin Moyo, othi kufuze ikhansili ibelozwelo kuzakhamizi kuvulwe amanzi ngoba kunje izambuzi ezinengeni kazisebenziseki.
" Besigisa bavule amanzi okwesikhatshana sonesi kuselomkhuhlane lo, ngoba kunje ezambuzini akusangeneki njalo inengi kalenelisi ngokugcweleyo ukukhokha zonke indleko ezisemoyeni."
Phezu kwembangela yokuvalelwa amanzi, okhokhela inganganiso yeWomen’s Voice, uNkosikazi Loveness Nyoni, uthi okunye njalo okwenza isigaba lesi sihlaselwe ngumkhahlane wohudo yingecekeza ekhona emakhaya kanye lasegangeni ngesizatho sokuba inengi elihlala emikhukhwini kalilazambuzi.
"Iganga libolile, njalo labantu bangamatshapha. Phezu kwamanzi, Sikhuthaza abantu bonke ukuba bahlanzeke, bebuthe njalo ingcekeza esemakhaya."
Kodwa ephendula kulesisikhalazo sokuthi amanzi avulwe ezindlini kuhlanzeke, usibalukhulu walelidobho leli uMnumzana Ronnie Dube uqine ngelokuthi abasoze bevule yokuba izakhamizi zikweleda izigidi ezedlula ibhiliyoni yemali yakuleli.
Uhlupho lokusweleka kwamanzi okwenzakala edolobheni leli kuyimvama njalo lakwamanye agoqela koBulawayo kanye leHarare. Ingcwethi kwezempilakahle zithi ukuze umkhuhlane wohudo lo owaqala ngenyanga kaNhlolanja nyakenye uphele kufuze abantu bethole amanzi eneleyo njalo ahlanzekileyo.
Ngokutsho kohlangothi lwezempilakahle ngeLwesihlanu, umkhuhlane wohudo ubusu abantu abafika phose amakhulu amahlanu – 496 njalo kwabanjwa abedlula inkulungwane ezingamatshumi amabili -22,356 begula lumkhuhlane.
Forum