Izakhamizi zemaphandleni zithi kumele kubunjwe imithetho ezaqeda udlame lwemakhaya ukuze inani labahlukuluzwayo liyehle, lokhu kuza ngesikhathi kunanzwa amalanga alitshumi lasithupha yomkhankaso yokuqeda udlame emakhaya olwe 16 Days of Activism against Gender Based Violence.
Izakhamizi esixoxe lazo zithi ukuqhamuka komkhuhlane weCovid 19 okudale ukuvalwa kwelizwe okweLockdown kudale ukufuthelana ezimulini inani labahlukuluzwayo laqonga.
UNkosikazi Saziso Khumalo oweInsiza ngomuye walabo abakhala ngeLockdown.
Ngokunjalo uNkosazana Senzeni Maphosa isikhulumeli sabatsha kubandla leMDC elikhokhelwa nguMnu Nelson Chamisa eZansi yemaNdebeleni uthi kuyadingeka ukuthu imithetho efana leMarriages Bill ipasiswe ngokuphangisa ukuze kwenqatshelwe udlame emakhaya.
UNkosikazi Nonhlanhla Mlotshwa osuka kuWard 4 eMatobo South uthi abahlukuluzwayo emakhaya bayaziswela indawo zokuphephela.
UMnu Lovemore Ncube erinye njalo isakhamuzi seMatobo sithi inengi labobaba lifela ngaphakathi lapho lihlukuluzwa ngabesifazana.
UMqondisi wenhlanganiso elwela amalungelo abomama eyeWomen Development Association of Zimbabwe uNkosazana Sethekele Tshabangu uthi inengi labomama bemaphandleni liyayiswela imfundiso ngamalungelo abo.
Ekhuluma lentathelizindaba ngoLwesithathu umsekeli kamphathintambo obona ngeziphathelane labesifazana uNkosikazi Jennifer Mhlanga uthe amapholisa asegcizelele ukuthi ngempela izehlakalo zokuhlukuluzwa kwabomama ziyakhuphuka njalo labesilisa labo bayahlukuluzwa.
