Eminyakeni edluleyo abavoti bebelethuba lokukhetha abazabavotela phakathi kwamabandla alitshumi kumebe amane.
Lo umnyaka amabandla azavotelwa ayedlula ikhulu.
Lokhu sekutshiye izakhamizi zeZansi yemaNdebeleni zisithi ukwanda kwalabo abafuna ukuvotelwa kukhetho oluzayo sekubatshiye betshaywa ngamakhanda ukuthi bavotele bani
Bangamatshumi amabili lantathu abazancintisa kukhetho lokudinga umongameli welizwe lonyaka kuthi abafika phose ikhulu bazancintisa kukhetho lwabameli bedale lephalamende esabelweni seZansi yemaNdebeleni.
Ukudabuka phakathi kwebandla leMDC T kanye lokubunjwa kwamabandla amatsha sekudale uhlupho kuzakhamizi ezinengi ebesezijayele amabandla abalisa iZanu PF, ele MDC T kanye leleZAPU.
UNkosazana Maryjane Moyo oweNkazhe uthi kubenzima ukukhetha.
Ngaphandle kokudideka ingqondo uMaMoyo ulokwesaba ngodaba lokuvota lolu.
Esinye isakhamuzi uMnu. Mandla Nyoni owakoMzimuni uthi bafuna ukukhetha abameli abaqotho.
Abamenywe ukuzohlola indlela lolukhetho oluzaqhutshwa ngayo ama Election Observers asuka emazweni kumanyano weEuropean Union sebefikile kulumhlubulo lapho ababhoda behlola umumo phambi kokhetho kukhangelelwe ukuyavota mhlaka 30 kulinyanga.
Kusenjalo loba nje indlala isibhahile ezansi yemaNdebeleni izakhamizi kulumhlubulo zithi ziyalwamkela uncedo lokudla oluvela kuhulumende lenhlanganiso ezizimeleyo ezibalisa iUSAID.
Sixhumane loNkosazana Patience Moyo eMadlambuzi ePlumtree ezohola ilambazi lamafutha okuphekisa okuphiwa labo abalabantwana abangaphansi kweminyaka emibili yinhlanganiso.
Izansi yemaNdebeleni ihlezi ibhekane lendlala embi ngenxa yokungani kuhle kwezulu njalo inengi lithi lindlala izaphela kuphela nxa kungakhiwa idamu leTuli-Manyange Dam kusungulwe izivande zokulima ngokuthelezela.
