Zithe zihlaba amakhuba ngoLwezi njengabo bonke abalimi elizweni izakhamizi zeBulilima ePlumtree, bezikhangelele ukutshaya inala zenqabele indlala evame ukuzihlasela.
Kodwa ngokusilela kwezulu okukhona izakhamizi lezi zithi ithemba lazo lilakho ukuphelela eboyeni njengezithukuthuku zenja. Izifuyo lazo zibikwa zicakile ngoba amadlelo engakahlumi kuhle ngenxa yokusilela kwezulu. Ilanga lona libikwa lingatshisi nje likhipha inhlanzi emanzini.
Ukhansila kaWard 11, yona egoqela oMadlambudzi, iMangubo kanye lezinye indawo zeBulilima, uMnu Thamani Ncube utshele uNtungamili Nkomo weStudio 7 ukuthi izilimo sezitshe okokuthi lanxa izulu lingaze line isivuno salonyaka sizakuba sincane kakhulu.
