Bekuyisiphithiphithi eHarare ngoMvulo amalunga ebandla leZanu PF elungiselela umhlangano wawo oweCongress oqala ngoLwesibili.
Okuzakwenzelwa khona lumhlangano kufakwe amatende lezitalada eziphiwe amabizo atshiyeneyo agoqela elithi Dr. Grace Mugabe Way, Gutsaruzhinji Walk leRobert Mugabe Square.
UMongameli Mugabe wethekelele lindawo waveza ukusuthiseka ngamalungiselelo.
Umhlangano lo uza kulokufuthelana okukhulu kuZanu PF phakathi kwecele elibikwa likhokhelwa nguMnu Emmerson Mnangagwa lelikaNkosikazi Joyce Mujuru.
Ababili laba bafuna isikhundla sikaMugabe nxa ethe wasuka embusweni.
Kodwa amathuba kaMujuru akhanya esefiphele ngemva kokuba etheswe icala lokuzama ukugenqula uMugabe njalo abasekeli bakhe basuswa ezikhundleni zabo endaweni ezitshiyeneyo zelizwe.
Abanengi bayazibuza ukuthi kambe uMujuru uzaphatheka yini kulumhlangano.
Omunye umbuzo ngowokuthi kambe ngobani abazakhethwa nguMugabe ukuthi babe ngabasekeli bakhe ngemva kokuba ephiwe amandla libandla eliguqule isisekelo salo.
Ukuhlaziya loludaba sixhume ingcwethi kwezombusazwe uMnu Mlamuli Nkomo.
