Umphathintambo obona ngezamandla kagetsi uMnu Dzikamai Mavhaire uthi uhulumende sephe umsebenzi wokuqhelisa isititshi seHwange Thermal Power Station kunkampani yakweleChina, iSino Hydro.
Uhulumende wenza lokhu ngemva kokuthathela lumsebenzi enye njalo inkampani yaseChina, iChina Machinery and Engeering Company esithi yayisehluleka umsebenzi.
Ilizwe selileminyaka eminengi libhekane lodubo lokusilela kwamandla kagetsi.
Umsebenzi weHwange Power Station lo uzabiza imali engange $1.3 billion.
UMnu Mavhaire ukhethe amalunga amatsha amaboard amankamponi aphansi kweZesa ngeviki edluleyo.
Kodwa inengi lisole kakhulu inyathelo leli ngoba amalunga amanengi engabantu beZanu PF.
Omunye wabasole lelinyathelo njalo othi ukuphiwa umsebenzi weHwange kunkampani entsha akusoze kulethe umahluko, ngumhleli weSouthern Eye, uMnu Kholwani Nyathi.
Amazwi kaNyathi agcizelelwe yingwethi kwezenotho uMnu Rejoice Ngwenya.