EleZimbabwe linanza iminyaka engamatshumi amathathu lasithupha lithole uzibuse, ingcwethi kwezempilakahle zisithi ukwehla kwenani labantu abalegcikwane kuyancomeka lanxa nje uhlangothi lwezempilakahle lubhekane lendubo ezinengi zokusilela kwabodokotela, abongi, imithi, imitshina yokusebenzisa kanye lokuqonga kwengozi yemikhuhlane egoqela eyemvukuzane kanye leyetshukela.
Uhlupho olukhulu iZimbabwe ebhekane lalo kuhlangothi lwezempilakahle kusukela ilizwe lithola uzibuse ngolwengculaza, yona eyaqala ukumemetheka kakhulu ngesikhathi inotho yakuleli kanye lobudlelwano lamazwe asentshonalanga sobubhidlika.
Kungakhathalekile ukuswelakala kwemali, iZimbabwe yenelise ukwehlisa inani labantu elithelelwa igcikwane leli kusiya kutshumi lantathu ekhulwini – 13.8%, lonyaka lisuka kumatshumi edlula amabili ekhulwini, 24.6% ngomnyaka ka2003.
Ingcwethi zithi umsebenzi obukekayo eZimbabwe waqala lapho kusungulwa inhlanganiso yokwenqabela ukumemetheka kwengculaza iNational AIDS Council kanye lomthelo weAIDS Levy oyiwo owasebenza kakhulu ukuthenga imithi kanye lokuphatha inhlelo zemfundiso ngalumkhuhlane lumanyene lenhlanganiso eizizmeleyo zakwamanye amazwe lezelizweni.
Ingcwethi kwezempilakahle, uNkosikazi Belinda Ndlovu, uthi ilizwe livela kude njalo kulesizatho sokuthi abantu bajabule ngaloluhlangothi ikakhulu nxa kunanzelelwa ukuthi inani labantu elilegcikwane lilokhu lisiya lisehla lalamhlalokhu.
Lanxa kunjalo, ukuphelelwa yimisebenzi kwabantu abanengi elizweni sokwehlise inani lemali engena esikhwameni se AIDS Levy okwenza iNAC ithwale nzima.
UNkosikazi Rutendo Mabhena, ongumongikazi, uthi amanyathelo amahle elizweni alakho ukuphelela emoyeni ngenxa yokuswelakala kwemali esitshiye izisebenzi kuloluhlangothi zisilela kuthi lalezo ezikhona zingaselathando lomsebenzi ngenxa yokungaphathwa kuhle ngumqhatshi onguhulumende.
Lokhu kugcizelelwe njalo nguMnumzana Obert Mangena, isakhamuzi, othi ukuswelakala kwabongi labodokotela ezibhedlela yikho osokubangele ukubhubha kwamaqubaquba abantu kuleli.
UNkosikazi Mabhena uqhubeke esithi lanxa kunjalo, kukhona okuhle okwenziwa kuleli okufana lokuphatha ukucubungula okunenginengi ngezempilakahle, okukhangelelwe ukuthi impumela isetshenziswe ukuthatha izinqumo ezizaguqula loluhlangothi.
Lonyaka ilizwe liphathe inhlolisiso kwezengculaza, umkhuhlane woqhuqho kanye lakuhlelo lokuhlatshwa kwabantwana amajekiseni wokuvikela imikhuhlane olulokhu luqhutshwa kungela mbadalo elizweni kusukela ngomnyaka ka1980.
Ekhuluma embuthanweni wokunanza uzibuse lamhla, umongameli uMnumzana Robert Mugabe uphathe uhlangothi lwezempilakahle esithi uhulumende wakhe uzimisele ukuqhubeka esebenza ukuthuthukisa imizamo yokulwisana lemikhuhlane ethelelwanayo kanye lengathelelwanayo.
UMnumzana Ben Ncube, osebenza lezibotshwa, uthi lanxa kukunengi okwenziwa nguhulumende, uyehluleka okwamagama lapho kukhangelwa amalungelo ezempilakahle ezibotshwa lapho imikhuhlane yofuba lengculaza elokhu imemetheka ingananzwa ngumuntu.
Uqhubeke esithi kumqoka ukuthi inhlangothi lengatsha ezitshiyeneyo ezifana lezemithetho, ezokubuswa kwamadolobho lezabelo kanye lezempilakahle kusebenzelane ndawonye ukuze kuthuthukiswe amalungelo abantu elizweni.
Ingcwethi ekucubunguleni ukuhlalisana kwabantu, uNkosikazi Sibusisiwe Ndlovu, uthi kunanzwa uzibuse kumele kukhulunyiswane ngokuletha inkokheli entsha ezaletha imiqondo emitsha iguqule impilo kazulu lapho edinga ukuguqulwa khona.
Uzibuse walonyaka uze ngesikhathi uzulu ekhulumisana ngokuzimisela kukahulumende ukuguqula impilakahle kazulu, kulandela isinqumo sendodakazi kamongameli ukuyabelethela elizweni laseSingapore etshiya izibhedlela zakuleli lapho abesifazana lensane abaqhubeka belahlekelwa ngumpefumulo mahlayana nje, ekubeletheni.
Lanxa kunjalo, inengi lithi hayi kuzalunga, akulahlwa mbeleko ngokufelwa kungakho lathi sisithi mpilo ende kuzulu labalaleli lapho ilizwe linanza ilanga likazibuse.
